Un añu d'ALSA en Chile

Va agora un añu, la empresa asturiana de tresportes per carretera Alsa Enatcar mercó parte del accionariáu de la casa chilena d'autocares LIT, introduciéndose asina en mercáu del tresporte d'América del Sur.

Esta primer alianza empresarial col mayor operador chilenu desarrollose depués al través de la xestión de delles llínies de llargu recorríu y tamién col contrata que ganó ALSA pa llevar el serviciu de Metrobús, parte del tresporte urbanu de Santiago de Chile que la empresa asturiana entamó a esplotar en mes de febreru con 126 autobuses marca Mercedes nuevos de paquete fabricaos en Brasil y que cumplen coles normes Euro III de contaminación, obligatories pa tolos coches nuevos qu'entren a dar serviciu na capital chilena.

Xunta esto, la empresa asturiana ta acabante de pesllar otru alcuerdu, esta vegada cola empresa TAS, de la que los Cosmen tienen dende marzu'l 49% de les acciones. Si LIT yera'l líder nel mercáu nacional chilenu, TAS ye una empresa que da serviciu al través de llinies internacionales d'autocares que van vale-y a la empresa de los Cosmen pa esparder la so presencia pela Arxentina y el Perú, pasando la flota de coches de llargu recorríu de 24 a 79 unidaes. La operación con TAS va significar una inversión de de 7 millones de dólares pal xigante del tresporte español

La entrada d'Alsa en Chile nun foi un camín estráu de flores. El pequeñu empresariáu chilenu del tresporte decatose de que la superioridá tecnolóxica y financiera de los Cosmen podía arrampuñá-yos el negociu y n'agostu del añu pasáu hubo en Santiago una fuelga de tresporte que paró la ciudá y que tuvo, ente otros motivos, la entrada nel negociu d'Alsa y Lit, que se pescanciaba como una amenaza na guerra ente empreses particulares pola xestión del serviciu públicu.