Un añu dende l’aprobación de los primeros topónimos

El 21 d'abril del 2005 el Conseyu de Gobiernu del Principáu d'Asturies dió-yos el preste a los trés primeros espedientes toponímicos que recuperaben con calter llegal, los nomes tradicionales de los conceyos de Carreño, el Franco y Llanes. Nun día qu'abría esperances nel procesu de dignificación de la toponimia asturiana, la conseyera Ana Rosa Migoya declaraba que l'aprobación de los espedientes toponímicos suponía "un pasu importante nel cumplimientu del pautu de gobiernu y na normalización del asturianu" mientres que'l Director de la Oficina de Política Llingüística Ramón d'Andrés vía nello "un fechu históricu ensin precedentes" y una gran alegría personal "al ver convertise en realidá un anhelu de va tiempu".

Aquel mesmu día, Ramón d'Andrés adelantaba que la siguiente tanda d'espedientes toponímicos podría pasar per Conseyu de Gobiernu enantes del mes de xunu d'aquel añu 2005, pero l'optimismu del responsable de Política Llingüística topó con una realidá burocrática testerona, y los siguientes espedientes en vese declaraos oficiales, que correspondíen a los conceyos de Gozón, L.lena y Llangréu, tuvieron d'esperar a mediaos del mes de xunetu. Cuatro meses más foi preciso esperar pa que la toponimia asturiana volviere a apaecer pelos discutinios del Conseyu de Gobiernu, hasta que'l 17 de payares del 2005 pasaron a trámite los espedientes de Sariegu, Cabranes, Villaviciosa y Bimenes.

D'entós p'acá, el Conseyu de Gobiernu yá nun aprobó más espedientes toponímicos, y nun ta claro cuando podríen dase de pasu los siguientes. La llista de conceyos que tienen yá reconocíos oficialmente pol Gobiernu asturianu los sos nomes de llugar tradicionales, llibres de deformaciones y procesos de castellanización, llega a los 10, pero va yá 5 meses que nengún espediente pasa peles xuntes que'l Gobiernu asturianu suel celebrar toles selmanes na so sede uvieina na cai Suarez de la Riva.

El parón del procesu de recuperación toponímica na máxima instancia del executivu autonómicu, pal que naide paez tener una esplicación, nun quier dicir que la Xunta de Toponimia, organismu que s'encarga d'ellaborar los espedientes toponímicos, tea allancada, y de fechu, güei mesmo tien una sesión de trabayu en conceyu de Caravia. Tampoco pue falase de qu'exista un parón al nivel de l'alministración local, y de fechu conceyos asturianos de la importancia de Siero o Xixón tan collaborando activamente cola Xunta de Toponimia na recuperación de los sos topónimos. L'enfotu de los conceyos na cuestión resulta tan claru qu'hai incluso conceyos como'l d'Ayer, qu'aprobaron a nivel local el so espediente, que tan adelantándose al determín del executivu asturianu, entamando pela so cuenta la rotulación de carreteres y llugares con unos topónimos que nun son oficiales dafechu.

En cualquier casu, los espedientes de conceyos yá terminaos y col preste previu de los mesmos Ayuntamientos van apinándose énte la puerta del Gobiernu asturianu y lleguen yá a la cifra de 11, correspondientes a Nava, Ayer, La Ribera, Llaviana, Colunga, Morcín, Riosa, Pezós, Grandas de Salime y Samartín del Rei Aurelio, a los qu'hai d'amestar el de Xixón, aprobáu apocayá col votu unánime de tola corporación del que ye'l conceyu con más habitantes d'Asturies. Toos tienen enriba l'interrogante de la so fecha d'aprobación definitiva.