Últimos díes pa presentase al Concursu de Cartes d’Amor d’Ayer

Esti miércoles día 14 remata'l plazu pa presentar orixinales pa la X edición del concursu de cartes d'amor del Conceyu d'Ayer. Les bases del concursu, que tien premios pa trabayos n'asturianu y en castellanu, especifiquen que les cartes, de tema amorosu, han tener una estensión máxima d'una fueya DIN-A4 per una cara mecanografiada. Tolos trabayos han presentase por triplicao xunto con un sobre zarráu, ensin identificación esterior y que tien que llevar dientro los datos personales y señes del autor o autora.

Les señes a les qu'han unviase los trabayos son les de la Oficina d'Información Xuvenil d'Ayer, asitiada n'Avda. Tartiere, 32. (CP 33670) de Morea d'Ayer. conseñando nel sobre "Décimu concursu de cartes d'amor". El plazu ta abiertu hasta'l día San Valentín, el 14 de febreru, siendo'l primer premiu pa cada modalidá -asturianu o castellanu- de 250 euros y una flor y el segundu de 190 euros y una flor más un premiu especial pa los participantes empadronaos n'Ayer de 190 euros y una flor. Amás de les perres, tolos premiaos van ganar un fin de selmana nel Hotel rural de trés estrelles "Ca'l Xabú" en réxime d'agospiu y almuerzu pa dos persones y con una ruta de senderismu guiada pel conceyu d'Ayer. El concursu namás queda peslláu a la participación de ganadores d'otres ediciones. Más información nesti enllaz