Últimos díes pa presentar trabayos a los concursos n’asturianu de la Conseyería de Cultura

El día 1 d'ochobre fina'l plazu de presentación de les obres pa la vixésima octava edición del premiu 'Xosefa Xovellanos', pa la decimotercer edición del 'Xuan María Acebal' de poesía, pal d'ensayu 'Máximo Fuertes Acevedo' y la cuarta edición del periodismu escritu 'Enriqueta González Rubín', premios qu'organiza la Conseyería de Cultura del Principáu pa potenciar la creación en Llingua Asturiana.

Los premios de novela, poesía y ensayu tán dotaos con 7.000 euros, mientres que'l de periodismu cuenta con 3.000 euros. La Conseyería de Cultura resérvase'l derechu de publicar n'esclusiva la primer edición de la obra premiada, considerándose pagaos col premiu los derechos d'autores d'esa primer edición. El fallu del xuráu va emitise enantes del 15 de payares y el premiu va entregase nun actu públicu a celebrar nel mesmu avientu d'esti añu 2007.

Ente los galardones de convocatories previes d'estos premios tán los más destacaos creadores en llingua asturiana de la hestoria de la lliteratura en llingua asturiana, según informó la Conseyería al traviés d'una nota de prensa.

Los interesaos puen presentar les sos obres y trabayos periodísticos-en llingua asturiana y ensin premiar n'otros concursos- nel Rexistru de la Conseyería de Cultura. Les obres tienen de dir en dos sobres pesllaos, poniendo'l títulu del trabayu y el seudónimu del autor. Nun sobre va incluyise l'orixinal y cuatro copies, y nel otru los datos del autor.