Los socios del UC Ceares van votar l’usu del topónimu tradicional Ciares na denominación oficial de la entidá xixonesa

Unión Club Ciares. Ésta podría ser la denominación nueva del equipu d’esti barriu xixonés de salir alantre la propuesta d’un sociu d’utilizar el topónimu tradicional nel nome de la entidá. La cuestión va votase la fin de selmana del 10 de mayu coincidiendo col partíu contra’l CD Covadonga.

Na asamblea estraordinaria convocada ayeri nel llocal de l’Asociación de Vecinos La Cruz de Ciares decidióse la fórmula de llevar alantre esta propuesta presentada na anterior por dichu sociu. Dada la trescendencia d’esti cambiu, comentárase facer una votación nun día de partíu pa una participación mayor de la masa social, pa lo que se propunxo facela coincidir coles eleiciones del club, colocando dos urnes na mesa. Finalmente, y tres dellos alderiques, aprobóse por una mayoría amplia plantegar la entruga ‘¿Cuála quier que sía la denominación oficial del club?’, ufriendo dos respuestes ‘UC Ceares’, esto ye la de la so fundación nel 1946, o ‘UC Ciares’, emplegando’l topónimu tradicional –y oficial cola fórmula billingüe ‘Ceares/Ciares’– que los vecinos utilicen pa nomar al barriu y a la entidá.

Tres esti referéndum ente los socios del Ciares ta tamién el deséu d’iguar una modificación sufrida nel nome del club a finales de los años 90 por decisión de los direutivos de la época, ensin consulta previa a la masa social, que fai que la so denominación oficial anguaño sía ‘Unión de Ceares Gijonés’. Pese a ello, tanto nel escudu como en tolos aspeutos del club, siguió utilizándose’l nome clásicu ‘UC Ceares’.

Solidaridá colos 5 de Zarréu

Los socios del Ciares aprobaron con unanimidá aprovechar el partíu del sábadu (17 hores) en La Cruz contra’l Caudal p’amosar dende la grada la so solidaridá colos cinco mineros condenaos a 2,5 años de cárcer por socorrer a trés compañeros tres una accidente na mina de Zarréu asocedíu nel 2012 y reclamar l’absolución de los trabayadores. Amás, va proponese a la plantiya salir al campu con una pancarta al respeuto, ensin descartar sumar al club de Mieres a la causa.

Otres decisiones foron el desendolcu d'un conveniu de collaboración col Gijón Fútbol Femenino pa la creación d'una escuela de fútbol mesta nel barriu, la incorporación a la Comisión de Clubes de Tercera y el refugu a les primes económiques por oxetivos.