Turón aspira a ser Bien d'Interés Cultural

La comisión estatal de Patrimoniu tien yá en marcha la redacción del plan director para declarar el valle de Turón como Bien d'Interés Cultural, una categoría de protección que pue ayudar enforma a recuperar les maravilles del patrimoniu industrial que se guarden nesti valle mineru atacáu pola crisis del sector hasta'l puntu de menguar la so población en más de 5.000 habitantes. La declaración, de facese efectiva, va suponer un reblagu y un llogru pa los colectivos sociales del valle, que lleven años pidiéndola.

Turón, que desarrolló una gran actividá minera dende l'últimu terciu del sieglu XIX y hasta la crisis enerxética de los años 70, yera poco menos que'l patiu d'atrás d'Altos Hornos de Vizcaya, empresa qu'acaparaba tola producción del valle pa llevalo hasta les fábriques vasques. La desapaición de la minería arrastró con ella más de 6.000 puestos de trabayu.

Turón ye dende va poco p'acá parte del "paisaxe protexíu" de les Cuenques, dientro del que yá s'entamaren acciones de recuperación de patrimoniu, casu de la restauración del castillete de Pozu Espinos, únicu pola so tipoloxía, y la reconversión de parte de la caxa del tren mineru en camín andariegu. Otru de los pozos del valle, el de Santa Bárbola, más conocíu por Pozu la Rebaldana, yá ta enxertu nos catálogos oficiales de Patrimoniu Industrial.

Xunta estos dos importantes pozos, dambos de la década de 1920, esiste tamién el Pozu San josé y a la entrada del valle, el Pozu Figareo, l'únicu entovía en funcionamientu y que data de 1860. Pa lo cimero del valle ta'l pueblu d'Urbiés, ún estrañu casu de poblamientu industrial nel monte asociáu a les mines del Cotu d'Urbiés, mientres que pa la parte de la Cuadriella consérvense dellos edificios como'l sanatoriu, la central térmica y delles tolves de los antiguos llavaderos, anguaño desmantelaos pa dexa-yos sitiu a los llaboratorios de Diasa. Too ello igua un conxuntu patrimonial de más de 360 elementos catalogaos que fai del valle enteru una visita bien prestosa pa deprender la historia d'Asturies más de recién. La Guerra Civil tamién dexó la so güelga nel valle, como preba la esistencia de la Fosa Común del Pozu Fortuna, onde descansen los restos de los afusilaos pola tropa nacional cuando tomaron el valle.