Tuenda y Alberto Álvarez Peña participen nun programa cultural en Samartín d'Ozcos

Na seronda del 2005 entamó en Samartín d'Ozcos una iniciativa cívica pa da-y vida cultural a esti conceyu de lo más occidental d'Asturies, esta iniciativa lleva'l nome de "Cultura contra el olvido" y agora cola llegada del bon tiempu, vuelve a echar a andar esti sábadu cola actuación de Tuenda y una charra d'Alberto Álvarez Peña.

El sitiu escoyíu pa facer la charra y el conciertu vuelve a ser l'hotel de la capital del conceyu "La Marquesita". Ellí, a les 22:00 hores d'esti sábadu día 22, va poder sentise la charra del dibuxante y etnógrafu Alberto Álvarez Peña, que va sirvir de primer platu d'una cena que va rematar cola música de Tuenda, el tríu de folk formáu por Xosé Ambás, Elías García y Pepín de Muñalén.

El programa sigue a los llargo de tol mes de mayu coles actuaciones del grupu gallegu "Hora Muerta" el 6 de mayu, la pareya de curdión y gaita de Xuan Nel Exposito y Milio Martínez xunta cola formación "Trés en Folk" el 13 de mayu. El programa d'esti mes mes va finar el 20 de mayu con una actuación teatral col títulu "Un percebe y trés pingüinos".