Trunfu con "trafullu"

Los palistes Martínez y Merchán ganaron el 67 Descensu del Seya nun emocionante final contra los campeones del mundu de k-2 maratón, l'asturianu Manuel Busto y el vascu Oier Aizpurua, a los que'l cantabru y el zamoranu adelantaron na mesma ría de Ribeseya baxando de la piragua y carretándola al llombu un cachu de cerca de 50 metros, consiguiendo asina ventaya abondo pa que la pareya vasco-asturiana nun pudiere allegase a ellos y algamando Martínez la so sétima victoria nel Descensu. Anque l'ayayu ye llegal, ello nun-yos prestó un res a los segundos clasificaos, que lo teníen too fecho pa llevar el trunfu cuando se vieron sorprendíos pola maniobra. Na categoría de k-1 el vencedor foi'l sudafricanu fue Anthony Stott, del equipu nacional de Sudáfrica, mientres que los otros dos puestos del podiu foron pa los asturianos Alberto Llera y Kiko Vega.



D'otra manera l'españíu d'una bomba pequeña xunta'l Hotel Playa de Ribeseya emporcó lacelebración de la Fiesta de les piragües. Según Delegación del Gobiernu, la bomba taba fecha con 300 gramos de dinamita Titadine y diba guardada dientro d'una tartera nuna bolsa de plásticu. La esplosión, que namás dañó la muria del Hotel Playa de Ribeseya. Una segunda bomba españó esa mesma mañana en San Vicente de la Barquera (Cantabria). Una llamada a los periódicos "La Nueva España" y "Gara" avisó de la esistencia de les bombes tres cuartos d'hora enantes de les detonaciones y reclamó l'autoría de les mesmes en nome d'ETA, autoría que confirmó'l Delegáu del Gobiernu Antonio Trevín.

Nun foi la desgracia más grave del día, y ye que yá a primer hora de la mañana del sábadu, el remolque d'un tractor que carretaba xente a ver el descensu zapicaba dexando l'accidente un muertu, y ventidós persones que precisaron d'asistencia. Otru accidente de tráficu asocedió dempués de la carrera, atropellando a altes hores de la madrugada un coche a más de 30 persones na ponte de Ribeseya, que taba atacada de xente que participaba na folixa dempués del descensu.