Trés de cada diez conductores asturianos reconocen que nun respeten los topes de velocidá

Acordies con un estudiu del Real Automóvil Club de Cataluña, el 33,4% de los conductores reconoz nun facer casu de los topes llegales de velocidá n'autovíes y autopistes. Con too y con ellos, los conductores asturianos amuésense como los más defensores de les sanciones penales pa los infractores, anque'l 13% d'ellos declare que nun se tienen por prudentes al volante.

Otru de los datos que rescamplen nesti estudiu, que se fizo entrugándo-yos a 4.711 conductores asturianos ye que'l 83,7% de los encuestaos declárense al favor d'instalar llimitadores de velocidá nos sos coches, siendo que'l 90% de los encuestaos reconocen que l'escesu de velocidá fai más difícil el lleer les señales de tráficu. Per edaes, los conductores mozos son los que más consienten col escesu de velocidá, mientres que, por términu mediu, los encuestaos tan d'alcuerdu en que s'entame a multar en pasando en 7 kilómetros a la hora la velocidá máxima n'autopista, en 5 en carretera y 9 en ciudá. El RACC recuerda que'l 15% de los accidentes de tráficu que tuvieron llugar nel 2004 tuvieron por causa l'escesu de velocidá.