TPA estrena 'La reválida', concursu n'asturianu que va emitise n'horariu d'audiencia máxima

|
La reválida

La clase va ponese los xueves a les 22.30 hores y nella pue participar tola familia.

L'actriz María Cotiello va presentar 'La reválida', concursu n'asturianu en clave d'humor nel que va facer el papel de maestra. En cada programa trés persones populares nel país van afrontar cinco pruebes sobre conteníos que deprendieren na escuela pa ver si s'alcuerden d'ellos o yá los escaecieron.

El ciclista Chechu Rubiera, el cantante Vicente Díaz, l'espertu en deportes tradicionales Pola, la diseñadora Maite Capín, la música Mapi Quintana, l'escritor y periodista Inaciu Galán, l'actor Alberto Rodríguez o la gaitera Andrea Joglar son dalgunos de los 'escolinos' que van pasar pela clase de Cotiello. El premiu va ser solidariu, y el ganador de cada xornada va poder donalo a la entidá o causa qu'escueya.

El periodista Francisco 'Paco' Álvarez encárgase de la correición llingüística d'esta producción d'Ondas TV que se va emitir los xueves a les 22.30 hores en TPA. 'La reválida' cuenta col sofitu de la Conseyería de Cultura, Política Llingüística y Turismu, y la collaboración de l'Academia de la Llingua Asturiana (ALLA).

Contador Estadistiques