TPA dedica un homenaxe a Ígor Medio nel decimosestu aniversariu de la so perda

|
Homenaxe a Ígor Medio TPA

San Xuan, aparte d’una xornada de rituales y de festexu, quedó marcada nel 2006 na música asturiana como’l día nel qu’Ígor Medio y Carlos Redondo siempre tornen al recuerdu. Esi añu dexáronnos nun fatal accidente y TPA va emitir el sábadu los programes especiales de la Selmana de les Lletres dedicaes al dibuxante como homenaxe.

Medio y Redondo yeren integrantes de Felpeyu, banda cola que tocaron na Foguera de Corvera na Nueche de San Xuan a una alta hora de la madrugada por decisión del conceyal responsable magar que conocía que contaben con una actuación contratada’l día siguiente en Catalunya. Una actuación, la de Tresona, que nun llegó a producise completa por mor del robu de la llave del xenerador enantes del so turnu sobre l’escenariu que dexó ensin lletricidá la celebración.

La desgracia diose na carretera esa mesma mañana, n’Euskadi, con un accidente de la furgoneta del grupu nes primeres hores del día nel que perdieron la vida los dos músicos. Un duru golpe pa la música asturiana, que nunca escaeció a los sos compañeros.

Esti añu la Conseyería de Cultura, Política Llingüística y Turismu dedicó la Selmana de les Lletres Asturianes a Medio aprovechando’l cincuentenu aniversariu de la so nacencia. Y ente les munches actividaes entamaes prodúxose un documental entituláu ‘Onde soi quien quiero ser. Una semblanza d’Ígor Medio’ y entamóse ‘El conciertu d’Ígor Medio’ cola participación de Felpeyu con collaboraciones de músicos y amigos de Medio, cita na que Redondo tamién tuvo nel recuerdu.

TPA, coincidiendo col decimosestu aniversariu de la so perda, emite un día depués, mañana a les 22.30 hores, una programación especial nel que va emitir como homenaxe estes dos producciones.

Contador Estadistiques