La tortiella, pinchu estrella de los chigres de Samartín

Samartín del Rei Aurelio celebra esta fin de selmana l'eventu gastronómicu n'asturianu 'Samartín de les tortielles'. Nél participen 27 chigres de L'Entregu, Sotrondio y Blimea.

Nesta cuarta edición de l'actividá hermana de 'Samartín del pinchu', dambes entamaes por Empresarios y Comerciantes de San Martín del Rey Aurelio (ECOSAM), les propuestes de los responsables de los estableciones hosteleros presenten creaciones orixinales con ingredientes tan variaos como salmón y gula, bacaláu, chipirones, gambes, bonitu, carne ibérico, chorizu y morciella, picadiellu o xamón. El preciu de cada pinchu va ser de 1,50 euros, cola posibilidá de sumar una cerveza San Miguel por 1,60 euros más. Los veceros tendrán a disposición 2.000 gastromapes pa conocer los chigres participantes y les sos tortielles.