Torres toma posesión del so cargu como eurodiputada utilizando l'asturianu

Estefanía Torres convirtióse esti miércoles na segunda eurodiputada asturiana de Podemos. La pixueta decidió tomar posesión del so cargu n’asturianu y va incorporase al intergrupu parllamentariu de Minoríes Llingüístiques.

La númberu 8 de la llista de Podemos a les Europees incorpórase al Parllamentu Européu tres la renuncia de Pablo Echenique –entantes yá lo fixeran Carlos Jiménez Villarejo y Teresa Rodríguez– depués de resultar escoyíu secretariu xeneral de Podemos Aragón y ponese a trabayar na ellaboración del programa eleutoral del otru territoriu del Estáu onde la so llingua llariega nun ye oficial. La toma de posesión por parte de Torres celebróse güei col xestu de facelo en llingua asturiana: “Sí, prometo acatar la Constitución hasta que la xente del mio país la camude pa recuperar la so soberanía y los sos derechos sociales”.

El llabor de la politóloga n’Europa va centrase na Comisión d’Agricultura y Desarrollu Rural, y na de Mediu Ambiente, Salú Pública y Seguridá Alimentaria, anque tamién tien previsto incorporase al intergrupu parllamentariu de Minoríes Llingüístiques pa dar voz a la realidá asturiana.

Cuatro representantes asturianos n'Europa

La incorporación de Torres al Parllamentu Européu fai qu’Asturies pase a contar con cuatro representantes n’Europa. La llexislatura principiáronla Jonás Fernández (PSOE) y Ángela Vallina (La Izquierda Plural), anque al pocu tiempu Tania González Peñas (Podemos) ocupó un escañu tres la renuncia de Jiménez Villarejo. Nel periodu anterior esta llista formábenla Salvador Garriga (PP) y María Muñiz y Antonio Masip (PSOE). Otra manera, Andecha Astur algamó representación l’añu pasáu n’Europa al traviés de la coalición Los Pueblos Deciden, cargu qu’ocupa’l gipuzkoar Josu Juaristi (EH Bildu).

Na semeya, González Peñas y Torres.