Torna'l festival de cultura urbano de Samartín

|
Que Nun Apare 2019

Va celebrase la so quinta edición, nesta ocasión baxo'l nome de Que Nun Apare!.

L'Asociación Cultural L'Osu Xabaz encárgase de la organización mañana d'esti eventu, que tuvo que suspender la edición del 2020 y que nun s'entamó nel 2021. Failo col mesmu espíritu qu'enantes de la pandemia, con una xornada d'actividaes de baldre nel parque d'El Florán al rodiu de la cultura urbano nel que participen numberosos collaboradores.

El V Festival Que Nun Apare! va arrancar a les 11 hores cola apertura del mercáu, onde van instalase más de 20 puestos d'artesanía, ropa, productos llocales y comida. Tamién va principiar l'actividá nos xuegos d'hinchar de baldre pa neñes y neños, asina comos los deportes tradicionales con 6 Conceyos, mentes que la música va ponela la bandina del conceyu Cuatrolan.

A les 13 hores van aportar scooters clásiques nun alcuentru entamáu pol festival y a les 13.15 hores Iniciativa pol Asturianu va poner una charra sobre la llingua del país. 6 Riales va amenizar la sesión vermú-culete colos sos cantares populares.

Llucha valtu

Yá de tarde, a les 16 hores, entamen les soundsystems coles pinchaes de Miguina Selektah, Lluis y los integrande d'Allanai y Bassturias. El valtu va tener espaciu a les 17.30 hores con una charra-taller participativu de la Lliga Celta d'Asturies.

Los conciertos, mentes, van empecipiar a les 19.30 hores con Banda Gitana, pa dexar llueu pasu a La Tarrancha. La música de raigón xamaicano va tonar darréu col I Meeting de Soundsystems d'Asturies, que va pesllar la xornada.

La organización habilita una zona d'acampada nel mesmu parque, gracies a la collaboración del EI San Martín, pa les persones de fuera que quiera acudir y nun garrar depués el coche.

Prefolixa

Esta tarde'l Centru Social Autoxestionáu La Semiente va acoyer una prefolixa dende les 20 hores con un pinchéu y pinchada de Faba Phanti I, Sandra Doch y Miguina Selektah.

Na semeya, un momentu de la última edición del festival, nel 2019.

Contador Estadistiques