Torazu celebra’l domingu’l Festival de la Boroña de Forna

Les fornes tradicionales barru de Torazu van trabayar a estayu esta fin de selmana. La población cabraniega celebra’l domingu’l Festival de la Boroña de Forna, certame que tamién inclúi un mercáu tradicional, ente otres actividaes.

El Campu de la Capiella de la Nuesa Señora de la Sienra va ser, a partir de les 11 hores, cuando van abrir los puestinos del mercáu tradicional de productos artesanos y agroalimentarios, l’epicentru de la folixa, que se presentó esta mañana nel Centru d’Información Turística del Principáu d’Asturies, con sede n’Uviéu. Al meudía ta previstu’l pasucais de Los Yerbatos y El Corriellu la Pandorga, pa depués dar pasu a la llectura del pregón, que va correr a cargu de la presentadora de la TPA, Sonia Fidalgo.

A les 13.30 hores va principiar la xinta de boroña preñada con xamón, chorizu y panceta fecha nes fornes tradiconales de Torazu. Ésta pue disfrutase nun menú que tamién inclúi arroz con lleche de Cabranes y la bébora, por 18 euros –hai la posibilidá de camudar la boroña por costilles y criollu–. Les persones interesaes nuna ración pueden mercar los vales –la organización recomienda que nun se dexe pal mesmu día de la folixa– nos establecimientos siguientes: Bar Joanna y Parrilla el Sena (Torazu); Casa Joselu, Casa Suárez y El Rincón de Cabranes (Santolaya); Casa Mary (Arboleya); Bar La Encrucijada y Bar-restaurante Camás (Cabranes); Cafetería Denver (L’Infiestu); La Bolera (Anayo); Bar El Areñal (Coya); Cafetería Monserrat, Café de Vicente y Sidrería La Ballera (Villaviciosa); y Casa Ferino (Xixón). Yá de tarde, habrá teatru a cargu del Grupo de Teatro Mujeres de Camás y Algunos Pueblos Más (16.30 hores).