Tope históricu del petroleu con 43 dólares el barril

La crisis de la petrolera rusa Yukos y la difícil situación n'Iraq tiraron p'arriba pelos precios del petroleu hasta algamar el barril West Texas los 43,8 dólares mentanto que´l barril Brent asitióse penriba los 40 dólares, a un dólar del so tope históricu.

Con ello, los mercaos financieros tuvieron un pieslle del mes de Xunetu bien feble énte'l baxu volume de negociu y les duldes sobre les estadístiques macroeconómiques. La bolsa tuvo'l segundu mes de perda col Ibex-35 perbaxo de la cota sicolóxica de los 8.000 puntos.

Ente les estadístiques de la selmana, les más importantes vinieron de los Estaos Uníos, onde'l PIB del segundu trimestre (+3,0%) quedó siete décimes perbaxo de lo que se contaba, lo mesmo que l'índiz de consumu personal.

Al otru llau del Atlánticu, el datu que más rescampló na na Zona Euru foi l'índiz de confianza del consumidor, que cayó 14 puntos enteros.

Con ello la selmana foi negativa nos mercaos internacionales, que tampoco nun van tener cambeos importantes n'agostu en cuantes que los más de los inversores van tar de vacaciones. Sicasí, en Wall Street l'índiz Dow Jones algamó la cota de los 10.000 puntos con una xuba del +0,1% y el tecnolóxicu Nasdaq remató una mala selmana con una feble xuba del +0,33%. Nel Vieyu Continente tanto Francfort como París y Llondres tuvieron perda.

Cayida del 2% nel pasáu mes de Xunetu na Bolsa de Madrid onde'l selectivu Ibex-35 s'asitió nos 7.919,30 puntos. El volume de negociu nun llegó a los 2.000 millones d'euros y los inversores yá ficieron el macutu pa garrar fuelgu nel mes d'agostu. Ente les xubes destacaron Terra, Telefónica, Arcelor y Altadis, y nel terrén de les perdes Tafisa.

L'anuncia de la selmana foi la compra pola filial d'Altadis, Logista, de la distribuidora de tabacu italiana Etinera a la British American Tobacco (BAT) por 566,4 millones d'euros. A los inversores presto-yos muncho esti movimientu d'Altadis y ficieron un apueste pol valor de la tabaquera. Tamién foi una anuncia importante la venta del portal Lycos por parte de Terra. El comprador de la filial de Terra va ser una compañía coreana que va pagar pol devaluáu buscador el 1% de lo que Telefónica pagó nel so día por Lycos.

Los mercaos tuvieron pendientes del mercáu enerxéticu con un petroleu en xuba llibre y amenazando cada vegada más la estabilidá económica. A lo llargo del mes de xunetu l'oru prieto tuvo una xuba del 15%. Con too y con ello les bolses tan aguantando bastante bien estes cotizaciones. Xunta la inestabilidá d'Iraq, el procesamientu del presidente de Yukos y la intervención del Kremlin na primer petrolera rusa col oxetivu de controlar a los oligarques del país ta poniendo en peligru les esportaciones d'un de los principales productores de petroleu mundiales.

Nel mercáu de renta fixo, selmana probetaya pa los bonos con un bund alemán con una perda de rentabilidá hasta'l 4,20%. Nel mercáu de divises l'euru peslló nos 1,2050 dólares unidá.