Toli Morilla edita’l so primer recopilatoriu con cantares n’acústicu y otros recuperaos de dellos discos

|

‘Estándar y probes’ ye’l nome del primer recopilatoriu de Toli Morilla, que se carauteriza por tener dos partes bien diferenciaes. El cantautor va presentar esti discu’l xueves en direuto nel Café Trisquel col acompañamientu d’Ángel Miguel.

Según esplica’l propiu Morilla, esti trabayu tien dos cares, “A y B, anque físicamente nun esista nada más qu’una. Esto ye asina pola diferencia qu’hai ente les 18 grabaciones qu’aparecen nesta edición”. La primer d’elles, l’A, son nueve cantares grabaos n’acústicu, xunto con Ángel Miguel, nos TUTU Estudios de Sergio Rodríguez. “Ye lo más asemeyao a un conciertu en vivo”, añade Morilla, qu’espera qu’esta parte sirva tamién como carta de presentación pa unviar a festivales, teatros, sales y programadores de conciertos, y asina “poder facer lo que más nos presta: tocar”. Nesta parte, inclúinse instrumentos como guitarres, mandolines, dobro y harmóniques.

Mentes, la segunda parte, la B, “son nelles mesmes nueve cares B, una esbilla d’esos cantares que quedaron perdíos pelos discos ensin volvese a tocar enxamás”, apunta Morilla, qu’añade que “quixi rescatalos de la mugre’l tiempu y da-yos otra oportunidá”. El cantautor, qu’algamó muncha reconocencia tanto n’Asturies como fuera de les nueses llendes gracies al discu de versiones n’asturianu de Bob Dylan, pretende con esti discu –que coincide col so 15 aniversariu como artista– dar a conocer el so trabayu propiu a esos siguidores nuevos y, al mesmu tiempu, reiventar dellos cantares, que se van poder sentir esti xueves, a partir de les 21.30 hores, nel xixonés Café Trisquel, de cara al so públicu más fiel.

 

Contador Estadistiques