Superman va convertise nel primer superhéroe en falar en llingua asturiana na pantalla

|

Gonzali Producciones entama col doblaxe al asturianu de la primer serie d’animación de Superman, que s’emitió en cines ente’l 1941 y el 1943. D’esta forma, el mozu nacíu nel planeta Krypton va ser el primer superhéroe en falar n’asturianu.

En concreto, esta empresa especializada nel doblaxe profesional a la llingua asturiana va trabayar colos 9 episodios primeros d’una serie de 17 curtiumetraxes que Fleischer Studios anició nel 1941 depués del ésitu que supunxo nel 1938 el cómic del personaxe creáu seis años enantes pol escritor estauxunidense Jerry Siegel y el dibuxante canadiense Joe Shuster. Éstos, encargaos por Paramount a los hermanos Fleischer, tienen un llargor d’ente 7,5 y 9 minutos y costaron 50.000 dolares caún, una cantidá perimportante pa la época. Según espliquen dende Gonzali Producciones, la calidá de la producción “ye impresionante”, con una animación “fluida y dinámica”, y unos dibuxos mui asemeyaos a los de Shuster nel cómic. Por estos motivos, el capítulu inaugural de la serie llegó a tar nominada al meyor curtiumetraxe animáu de los Oscar del 1941, categoría que se llevó finalmente Walt Disney con ‘Lend a paw’, cinta protagonizada por Pluto y Mickey Mouse.

La estructura de cada capítulu ye siempre la mesma: una introducción cola música de Sammy Timberg, la presentación del malu que tendría problemes con Lois Lane y Clark Kent –el nome terrestre de Superman– y l’apaición del superhéroe al rescate cola frase "esto paez un trabayu nuevu pa Superman”. Pa finar, apaez un títular del Daily Planet, onde trabayen los dos personaxes, sobre los fechos y una conversación ente Lane y Kent sobre Superman. Gonzali Producciones apuesta por una serie d’animación pal so proyeutu próximu “entendiendo'l so especial valir nel procesu de normalización llingüística en cuanto suponen unos productos mui apreciaos polos neños”, a lo que tamién ayuda la popularidá de Superman ente los más pequeños. Pa desendolcar esti trabayu, la empresa cuenta con una subvención del Conceyu de Xixón.

Contador Estadistiques