SUATEA y CC.OO denuncien irregularidaes nel entamu del cursu escolar

Los sindicatos SUATEA y CC.OO al traviés delles notes de prensa
denuncien "irregularidaes" nesti entamu de cursu escolar n'Asturies.
Asina, dambos sindicatos llamen l'atención sobre'l procesu pa cubrir les
vacantes nos centros educativos, asina como sobre la publicación de les
llistes d'interinos. Asimesmo CC.OO dio anuncia de que presentó un
recursu de reposición contra eses llistes y la convocatoria pa la
cobertura de vacantes, dos procesos nos que se cometieren "graves
irregularidaes" según el sindicatu.

Pa SUATEA "contra'l compromisu de la Conseyería colos sindicatos
en xunu, que suponía que la convocatoria de places vacantes pa
profesoráu interín a principiu de setiembre diba facese pola
llista vixente nesi momentu, la Conseyería publicó na tarde del 3
de setiembre una nueva llista provisional y convocatoria'l 4, dando-y
carácter provisional. Curiosamente, la llista taba preparada pa publicar
el día 20 d'agostu, pero nun se publicó hasta'l día 3 de
setiembre porque les atribuciones de firma d'estes llistes pasaron a la
Conseyería d'Alministraciones Públiques y nun val la firma del
Conseyeru d'Educación" polo que'l sindicatu conclui que "nun
hubo llistes definitives en tiempu y forma por culpa d'una firma".
Finalmente SUATEA declara qu'esti cambéu "d'última hora
supunxo qu'haya munchos aspirantes perxudicaos. Amás, son numberoses les
irregularidaes detectaes n'algunes d'estes llistes provisionales como errores
materiales na puntuación atribuida o persones que debían apaecer
y nun apaecen.

Pela so parte CC.OO denuncia una "doble irregularidad" na
xestión de cobertura de puestos de trabayu por profesoráu
interín nel cuerpu de Maestros. Según el sindicatu'l
"día 3 de setiembre publicáronse les llistes provisionales
d'interinidá ensin negociar nin publicar los criterios utilizaos pal
cómputu de los méritos, qu'afiten l'orden de prioridá pa
la escoyeta de destinos docentes". Asimesmo CC.OO indica que "cola
publicación de les llistes conseñóse un plazu de 10
díes pa reclamaciones", y "ayer fixose una convocatoria pa la
cobertura de puestos na que s'inclui llamamientu a los integrantes de les
llistes provisionales", llistes que pal sindicatu "nun tendrán
vixencia hasta que, resueltes les reclamaciones, tean elevaes a
definitives".