SUATEA y Andecha Astur protesten pol informe del Conseyu Consultivu sobre la Reforma del Estatutu.

El Dictamen del Conseyu Consultivu sobre la Reforma del Estatutu que s'entregó esta selmana al Gobiernu asturianu y del qu'Asturies.com adelantaba ayeri a los sos llectores parte del so conteníu, sigue sacando angüeñes nel asturianismu poles sos conclusiones contraries a la oficialidá del asturianu. Tres de los durísimos comunicaos d'Izquierda Asturiana y la Xunta Pola Defensa de la Llingua, agora son el sindicatu d'enseñanza SUATEA y la organización política Andecha Astur los que protesten poles conclusiones del informe.

El sindicatu d'enseñanza SUATEA, que recuerda que'l Conseyu Consultivu ta formáu por miembros que siempre tuvieron a la escontra de la oficialidá, diz que l'informe "fai papel moyao de la Constitución española y entra en valoraciones personales totalmente subxetives ignorando toles encuestes onde la población ye claramente favorable a la oficialidá". Pela so parte, Andecha Astur afonda na parcialidá del dictamen calificando de "artificios argumentales" les sos conclusiones que namás tendríen por oxetivu "sofitar la política del PSOE".

P'Andecha Astur "ye un fechu evidente qu'ensin oficialidá del asturianu nun pue haber normalización, y menos n'actual situación de carencia de drechos llingüísticos, polo que resulta mas bien ridícula la forciada argumentación d'esti muérganu consultivu", mientres que SUATEA albidra les repercusiones más negatives del dictamen asegurando que "de nun aprobase la oficialidá , estos señores que mos gobiernen o que formen parte d´un Conseyu que nun foi escoyíu pol pueblu van ser los responsables de la muerte y desapaición de la nuesa llingua".

La formación política Andecha Astur condena tamién el fechu de que'l dictamen refugue'l reconocimientu d'Asturies como nacionalidá asegurando que "los miembros del conseyu saben de xuru que Asturies ye un territoriu con hestoria, llingua y tradiciones propies". P'Andecha Astur Asturies axunta méritos abondos pa que se-y reconoza la nacionalidá, y acusa a PSOE, PP y IX-BA de ser "una clas política anquilosada y cerril que-yos importa tantu Asturies como Extremadura o Melilla" calificando al Conseyu consultivu de tar fechu a "imaxe y semexanza" d'estos partíos mayoritarios.