SUATEA solidarízase con Xurde Blanco

El sindicatu d'enseñanza SUATEA amestóse con un durísimu comunicáu a la riestra de denuncies públiques contra l'actuación de l'alministración asturiana nel casu del lletráu Xurde Blanco, al que se-y denegó un permisu pa poder operase por tar redactáu n'asturianu. La organización d'enseñanza calificó de "Sangrante, aberrante, llamentable y patética" la situación de Xurde Blanco y entrúgase si'l siguiente pasu va ser poner un mecanismu que detecte los "asturianismos" de la población.

Suatea llamenta que "a primeros del sieglu XXI y en sociedaes, supuestamente democrátiques pasen estes circunstancies" y asegura qu'ello "nun fai otro qu'avergonzase de les instituciones y de los sos rexidores". El sindicatu ofréz-y a Blanco "la nuestra más fonda y sincera solidaridá" y la so más enérxica repulsa énte esti nuevu ataque al usu de la llingua asturiana que sufrió un ciudadanu d'Asturies.

El sindicatu denuncia que'l casu fai rescamplar como la llei d'Usu del asturianu "queda curtia y escasa" y como "ye necesario, urxente y prioritario universalizar n'Asturies la equiparación de derechos que garantiza la oficialidá".