Suatea denuncia'l despidu de profesores

El sindicatu asturianu de la enseñanza valora negativamente'l procesu d'axudicación de places vacantes.

El Sindicatu Unitariu y Autónomu de Trabayadores de la Enseñanza n'Asturies denuncia la forma na que ta llevándose l'axudicación de places vacantes esti cursu, que según el sindicatu, va llevar a munchos centros públicos a nun poder cubrir les sos necesidaes docentes, amás de suponer el despidu de profesores interinos que van ser espulsaos de les llistes, "aun cuando posien tolos requisitos pa impartir la docencia nes sos respectives especialidaes".

Nesti sentíu'l sindicatu apunta que la nueva alministración lleva'l mesmo camín que l'anterior, yá que caltién el mesmo sistema que n'años anteriores yá llevantó bastante polémica. El sindicatu d'enseñanza critica que nun se tengan en cuenta les peticiones feches polos equipos directivos de centros públicos, lo que va suponer una baxada na calidá de la enseñanza.

Suatea non solo critica la cantidá de les places axudicaes si non tamién la forma. Nel comunicáu de prensa espublizáu pol sindicatu faen referencia a "la non esistencia d'un plazu formal de reclamaciones a les llistes de profesoráu y d'alegaciones a les places ". Según el sindicatu esto pon en dulda la traspariencia del procesu y impide al profesoráu disponer de tola información necesaria. Pa Suatea esto tendría fácil igua si les axudicaciones de destinos se ficieran n'actu públicu., como se fai n'otres comunidaes autónomes.

Finalmante'l sindicatu quier apuntar que "la discriminación que ta sufriendo'l profesoráu de la enseñanza pública contrasta col mantenimientu de los conciertos educativos de centros privaos y la falta d'atención a les peticiones de los centros que reclamen otra vuelta más profesoráu".