SUATEA denuncia que’l PSOE ”niega derechos fundamentales” en materia de llingua

L'últimu númberu del boletín del sindicatu d'enseñanza SUATEA inxerta un artículu nel que la estaya de llingua del sindicatu asitia la so postura énte'l debate de la reforma estatutaria n'Asturies. SUATEA afirma que "Tamos asistiendo de nuevu a una estratexa de desprestixu pa cola oficialidá de la llingua asturiana por parte del PSOE" que-y abulta "ensin argumentos nin voluntá de diálogu" . El sindicatu denuncia que, ensin oficialidá "niégasenos un derechu fundamental recoyíu na Constitución española" y llamenta tamién que'l PP tea tamién "de manera más ambigua entamando a asomar la so posición contraria a la Oficialidá".

El sindicatu d'enseñanza entrúgase pola aplicación a Asturies de la postura del PSOE "que tanto diz defender la España Plural y que según el so secretariu d'organización representa'l partíu de los derechos cívicos y ciudadanos" y concluye que "ye significativo qu´estos políticos que mos gobiernen "nun sían valientes p´afrontar d´una vegada esti tema" y que "dexen en manes de Conseyos Consultivos formaos por persones que siempre fueron detractores del asturianu decisiones que muncho mos tenemos mieu que nun seyan nada positives pa la supervivencia del nuesu idioma."

SUATEA píde-y a la clase política que llea "los resultaos de les distintes encuestes onde se ve una clara posición favorable a la oficialidá y que por cierto fueron encargaes por dellos gobiernos socialistes y feches por una persona socialista de gran prestixu" responsabilizando al actual gobiernu y a la oposición del PP de la muerte adulces de la llingua asturiana"