Somos Avilés quier conteníos asturianos nel AupLab.c

|

La conceyala de Cultura Yolanda Alonso reconoz que la presencia de temática asturiana na programación ye básicamente nula.

Xune Elipe treslladó nel Plenu últimu una entruga a la socialista sobre la falta de conteníos y temática de calter asturianu nel programa AupLab.c, qu’entama la Factoría Cultural, dependiente de la Fundación Municipal de Cultura. Les Aules Populares d’Avilés, antecedente del actual AupLab.c (Llaboratoriu de Proyeutos y Utilidaes Culturales), creáronse nel añu 2011 al traviés del Serviciu d’Educación del Conceyu y desenvuelve una serie de talleres, cursos y actividaes de calter estremáu, con una filosofía na que “prima la educación en valores, destacando la igualdá d’oportuninaes”, un programa que tien destinaes una partida de 310.000 euros pa los dos años vinientes.

“Na 29 edición de los cursos AUPA, bautizaos anguaño como AupLab.c, entamaos pola Fundación Municipal de Cultura, al traviés de La Factoría Centru Cultural, ufiértense nesti cursu 2015-2016 un total de 77 talleres y seminarios qu’abarquen nueve árees o disciplines de conocimientu. Ente ellos inglés iniciación, básicu, intermediu y conversación, francés nivel 0 y 1, árabe, sevillanes iniciación, sevillanes perfeccionamientu, flamencu, bailles de salón, ‘La Toscana: arte, cultura y llingua’ o ‘Obres maestres del Muséu del Prado’. Nel llistáu namás apaecen dos talleres rellacionaos col nuestru entornu cultural: ‘Historia d’Asturies. Edá Media’ y ‘Los xardinos d’Avilés y la comarca. Descubrir y conocer la naturaleza na ciudá’. Siendo ún de los oxetivos d’esti programa municipal educar en valores y deprender a ser ciudadanos y ciudadanes, creemos que tener la posibilidá de conocer el paisaxe cultural que nos arrodia ye mui importante, ¿tienen intención d’aumentar la presencia de temática asturiana nos talleres y cursos de les próximes ediciones, dando a conocer a tola ciudadanía que lo desee, por exemplu, la cultura, etnografía, historia, mitoloxía, llingua o tradición oral d’esti país?”, rezaba la entruga del edil de Somos Avilés.

La respuesta d’Alonso foi reconocer la práuticamente nula presencia de temática asturiana, argumentando que se solía pasar un cuestionariu a los asistentes pa que propunxeren conteníos pa la edición siguiente. Elipe recordó tamién a la edil la situación soprendente que se da n’Avilés, con ciudadanos matriculaos nos cursos d’asturianu de Corvera, onde son mayoría, pola falta de la mesma iniciativa nel llugar.

L’edil de Somos Avilés puntualiza qu’AupaLab.c ye un programa que lleva una empresa esterna y que l’anterior que lo xestionaba “tenía bastante más enfotu por esta cuestión, hasta'l puntu de que los cartafueyos con tola programación publicábense tamién n'asturianu (agora yá non)”.

Contador Estadistiques