Skype yá cuenta con una versión n’asturianu pa Windows

|

Gracies al llabor d’Iniciativa pol Asturianu, los usuarios de Skype na so versión pa Windows yá pueden disfrutar en llingua asturiana d’esti popular programa de comunicaciones. Pa ello, namái han de siguir siete pasos cenciellos.

La idea nació de la estaya de Rellaciones Internacionales de la organización que trabaya pa la normalización del idioma al conocer la esistencia del proyeutu ‘Skype Mini’. Ésti consistía na torna, coincidiendo col Día Internacional de los Traductores (30 de setiembre), de les 234 pallabres básiques del software de comunicaciones (VoIP) Skype a tantes llingües como fora posible. Tres contautar colos responsables del proyeutu, Iniciativa pol Asturianu decidió dar un pasu alantre y principiar cola torna completa de Skype, lo que supunxo la traducción de les 15.693 pallabres que componen la versión Windows d’esti software, un trabayu que duró alredor d’una selmana.

Depués de facer delles prebes, “tamos arguyosos d’anunciar que la llingua asturiana pue ser definitivamente usada en Skype na so versión pa Windows”, señalen dende la organización, qu’esplica la manera d’incoporar el nuesu idioma al programa en siete pasos cenciellos: “entra nesti enllaz (1); calca ‘Download this file’ (2); guarda l’archivu en cualesquier llugar del to ordenador –non nun direutoriu temporal–. Recomendámoste que lo guardes nel direutoriu propiu de Skype nel to discu duru (3); anicia Skype (4); ya sía enantes o dempués d’aniciar sesión, ve a ‘Herramientas/Cambiar idioma/Cargar Archivo de Idioma Skype’ (5); ve al direutoriu onde guardaste l’archivu ‘Asturianu.lang’ y cárgalo (6); ¡esfruta de Skype n’asturianu! (7)”.

Skype trátase d’un software que permite la comunicación por testu, audio y videu de baldre. Diseñáu nel 2003 n’Estonia polos creadores de Kazaa, ye propiedá de Microsoft dende’l 2011 –la firma de Bill Gates pagó 8.500 millones de dólares a los dueños del programa nesi momentu–, empresa que fixo esta compra pa sustituyir al popular Windows Live Messenger. Anguaño, Skype cuenta con millones d’usuarios per tol mundu y ye la ferramienta más utilizada poles miles de ‘lleendes urbanes’ repartíes pel planeta pa comunicase colos so familiares n’Asturies.

 

Contador Estadistiques