Skama la rede presenta "La Nuesa Historia"

El grupu va presentar esti domingu'l so primer discu entituláu
La Nuesa Historia. Amás tamién van tar na Noite folk d'As
figueiras xunta los grupos de folk Cádaba y Llangres.



Skama la rede ye un grupu qu'emburriáu pol so públicu y la so
aficicón a la música, y como non a la folixa, tenía
qu'acabar sacando un discu. Y ello ye que yá ta equí esi cd col
nome de La Nuesa Historia y espublizáu pola casa de discos
L'Aguañaz. Dempués de sacar l'añu pasáu una maqueta
col nome de Hestories absurdes y escosar les 300 copíes que ficieron,
pasen a contanos la so historia en doce cortes que van presentar esti domingu
31 en Candás na plaza'l Nodo a les 23:00 hores, dientro del programa de
les fiestes de San Felix de Candás. Pa sentir un adelantu del discu
tamién puede visitase la
web de la banda onde ta'l cantar "Internacionalista" disponible
pa descargar.



El grupu va tener un fin de selmana bien ocupao, yá que
mañana vienres van tocar na Noite folk d'As figueiras nel conceyu de Castripol, onde tamién el grupu d'A Caridá Cádaba y
Llangres.