Ska y punk-rock pa recordar l'ochobre del 34

Esta ye la propuesta del conciertu que va haber esti sábadu día 9 na sala Albéniz de Xixón.

L'asociación xuvenil "Darréu" entama'l conciertu "Asturies nun escaez. Ochobre 1934-2004", col que quier dalguna manera recordar l'espíritu d'aquella revolución que tuvo n'Asturies los sos acontecimientos más dramáticos. Pa facer esto la organización escoyó un cartel con nomes bien conocíos n'Asturies y fuera d'ella de la escena punk rock más radical. Los grupos que van participar van ser los madrileños "Habeas Corpus", los vascos "Skalariak", y los asturianos "Skontra", "La Tarrancha" y "Skama la rede".

El conciertu va entamar bien ceo, a les 18:00 va arrancar el primer grupu, nesti casu "La Tarrancha", y l'últimu grupu que va tocar ye "Habeas Corpus" a eso de les once la nueche. Les entraes tienen un preciu de 12 na ventaniella y 10 euros anticipada que pueden mercáse en chigres de Xixón, Avilés, Uviéu, Carreño, Siero, Llangréu, Villaviciosa, Noreña, Corvera y Ribesella. Pa saber los llugares exactos onde se vienden les entraes en cada conceyu, asina como pa saber más coses de tolo qu'arrodia a esti conciertu convidamos los nuesos llectores a visitar la páxina web del conciertu.