Sindicatos, partíos y colectivos d'izquierdes protesten en Xixón pola reforma llaboral

Xixón va ser l'escenariu esti martes día 20 de xunu d'una manifestación contra la reforma llaboral española entamada polos sindicatos CSI, SUATEA y CXT, alos que s'amiesta tamién un sector críticu de CC.OO. Sofiten tamién la marcha Andecha Astur, Izquierda Asturiana, PCPE y les organizaciones de mocedá MIAS, Darréu, CJC-CMC, UJCE y Sindicatu d'Estudiantes, amás de colectivos como FUSOA y El Militante. L'oxetivu de la manifestación, que va salir de la Plaza l'Umedal a les 20:00h ye'l de denunciar la reforma llaboral que roblaren va poco l'estáu, les patronales y les centrales sindicales más importantes del estáu.

Al paeceer de les organizaciones convocantes, la reforma va "subvencionar a los empresarios con dineru públicu pa que tresformen contratos eventuales en fixos" una smidida que se critica tamién por ser reversible, ello ye, los contratos fixos van poder facese temporales. La marcha faise tamién en protesta pola calidá d'esi trabayu fixu, que se diz que va ser "contratu basura indefiníu" polo baratu del despidu, que se rebaxa a 33 díes por añu trabayáu. Les organizaciones convocantes de la manifestación denuncien igualmente la reforma nel sistema de pensiones de la Seguridá Social, asegurando que se ponen más torgues pa consiguir derechu a pensión y que se quier desaniciar la pensión de vildedá para los nacíos dempués del añu 1978.

Colectivos y partíos que van participar na manifestación tan acelerando estos díes l'unviu de comunicaos colos qu'intenten da-y más repercusión a la mesma. Ye'l casu d'Izquierda Asturiana, qu'emitió un comunicáu con declaraciones del so portavoz Ignaciu Llope nes que califica a la reforma de "esplotación progresista".