Siguen los afayos de toliñes muertes na costa asturiana

El Centru pal Estudiu y Protección de les Especies Marítimes (CEPESMA) dio anuncia de l'apaición esta mesma mañana de dos toliñes muertes na playa de San Xuan de Nieva, la primera d'elles con traza de quedar prendida nun arte de pesca y la segunda con marques d'ataque d'un escualu, anque seguramente seyan marques post-mortem. Estos dos animales súmense a los trés qu'apaecieron a lo llargo d'esta primer selmana del añu repartíos ente L.luarca, Ribeseya y un tercer animal en Barayo, conceyu de Navia.

El Cepesma diz qu'a lo llargo de los últimos 15 díes yá van apaeciendo un total de 16 exemplares de toliña muertos espardíos per tola costa asturiana. Según Luis Laria, director del Centru d'Estudiu, esta mortalidá tan alta, polo que se sabe hasta agora peles necropsies, tien la so esplicación en que los animales quedaren prendíos nun arte de pesca ensin determinar, faciendo l'aire y la corriente l'efectu d'esparder los cuerpos per tola costa. Luis Laria diz que les toliñes suelen dir en grupos de 50 a 100 indivíduos, y esplica que ye normal que dacuando-yos pasen casos como esti.

Pa rematar la llista de cetáceos muertos, el día d'ayeri recoyóse tamién na rula d'Avilés, un tiburón pelégrín (Cetorhinus maximus) de 3,30 m. Esti animal, conocíu por ser l'únicu tiburón que s'alimenta de plancton, quedó prendíu nun arte de pesca.