Siguen les repercusiones del asuntu Carod Rovira

Esquerra Republicana de Catalunya va acudir al Tribunal Superior de Xusticia catalán pa qu'investigue l'usu que fizo'l Gobiernu Español de la información que-y apurrieren los servicios secretos del CNI sobre la entrevista ente Josep Lluis Carod-Rovira y ETA que'l diariu ABC asoleyó'l martes. El diputáu Joan Puigcercós dixo que'l so partíu pide tamién la dimisión del Presidente Aznar, como responsable últimu del CNI, responsabilidá que tamién chisca al candidatu popular Mariano Rajoy, que preside, en cuantes que vicepresidente, la comisión delegada de control del CNI. Joan Ridao, portavoz d'ERC, dixo que van solicitar una entrevista col fiscal del TSXC pa esplicá-y los delitos en que pudo incurrir el Gobiernu, ente los qu'apuntó la infidelidá en custodia de documentos restrinxíos, revelación de secretos, omisión del deber de torgar la comisión de delitos pol fechu controlar a miembros de la dirección d'ETA y nun detenelos y delitu de calumnia por incriminar a Carod-Rovira.

En parlamentu, la oposición va pidir en bloque al Gobiernu qu'esplique nel Congresu como pudo llegar la información secreto de la reunión del CNI (Centru Nacional d'Intelixencia al periódicu ABC. Asina, el PSOE va pidir a la fiscalía qu'investigue sobre'l "Informe Carod", mientres que'l líder d'Izquierda Xunida, Gaspar Llamazares, va reclamar tamién al Executivu qu'esclarie si'l CNI anda espiando a formaciones democrátiques. Hasta Coalición Canaria, históricu sociu del PP, tamién pidió güei al executivu que compareza en Congresu pa dar esplicaciones. La Mesa de la Diputación Permanente del Congresu ye la que tien que decidir esti llunes si s'atienden o non les demandes de la oposición, que tamién inclúin la entruga de porqué nun se detuvo a los miembros d'ETA. Sobre esta filtración el periódicu El País afirma na edición de güei que'l CNI ta malcontentu porque la hipotética filtración pon en peligru'l llabor de los axentes d'intelixencia.

El portavoz del Gobiernu, Eduardo Zaplana, niega dafechu qu'hubiere filtración de la información apurrío pol CNI al gobiernu y dixo que los intentos de la oposición de llevar l'atención a esi puntu son una maniobra pa tapar lo que nun tien escusa, que ye'l fechu de la xunta ente'l políticu catalán y ETA. D'otra manera, el ministru de Defensa, Federico Trillo, dixo que ye mentira que'l CNI ande siguiendo a dirixentes políticos democráticos. El ministru dixo a Radio Nacional que'l tiempu en que se facía eso "yá quedó p'atrás".

Aparte de la polémica política, la Fiscalía Francesa dio anuncia esta mañana de que diba actuar d'oficiu p'apautar si Carod Rovira cometió delitu al aconceyar con ETA en Francia, y el Fiscal Xeneral del Estáu Jesús Cardenal dixo que va investigar si Carod-yos prometiere contrapartíes a los interlocutores d'ETA