“Nel sieglu XII hebo una sofisticadísima reconstrucción memorial de los símbolos d’Asturies”, señala Alonso Álvarez

|

Raquel Alonso Álvarez protagonizó la charra mensual d’Ástura cola intervención ‘Ruinas, reliquias y cruces: la construcción histórica de los símbolos de Asturias’. “Nel sieglu XII hebo una sofisticadísima reconstrucción memorial de los símbolos d’Asturies”, apuntó la esperta medievalista. Éstos caltiénense anguaño ente la población.

El llocal social del Atenéu Obreru de Xixón acoyó esta actividá na qu’Alonso Álvarez contestualizó en primer llugar la época a tratar, los sieglos XI y XII, momentu de recuperación n’Europa tres la cayida del Imperiu Carolinxu. Ye nesti momentu cuando en tol continente principien a reconstruyise elementos memoriales, na mayor parte de les veces con manipulaciones y engaños, “dalgo mui común tres grandes crisis pa la conservación de determinaos privilexos”. Y Asturies nun foi esceición, yá que dende Uviéu buscóse l’afitamientu de símbolos cola fin de marcar diferencies colos episcopaos de Braga y Toledo.

Estes reconstrucciones memoriales facíense al traviés de testos, en concreto con cartularios, onde se recopilaben documentos anteriores, u oxetos. Nel primer casu, atopábense los cartularios solemnes, propagandísiticos y falsos de manera parcial, como’l Mercator de Corbie (1050), mentes que nel segundu utilizábense antigüedaes descontastualizaes, como l’A de Carlomagno esistente na Abadía de Concas o el tronu de Dagobertu de l’Abadía de Saint-Denis –que fundó–, anguaño na Biblioteca Nacional de Francia.

El casu asturianu

Col avance de la Reconquista y el treslláu de la corte a Lleón por Alfonso III (852-910), l’Arzobispáu d’Uviéu viose cuestionáu por Braga y Toledo, lo que llevó al entamu d’una reconstrucción d’elementos memoriales dende la diócesis pa responder a estes amenaces. Alonso Álvarez fala de qu'esti procesu diose en dos fases, una primera nel episcopáu d’Arias Cromaz, obispu ente’l 1069 y 1093, basada n’hipótesis; y una segunda, probada dafechu, protagonizada pol obispu Pelayo (ente’l 1101 y 1130).

Arias Cromaz, primer abad del Monasteriu de Courias, foi’l promotor de la ceremonia d’apertura del Arca Santa nel 1075 col rei Alfonso VI presente, una reliquia procedente de Xerusalen que tres la invasión persa nel 614 treslladóse al norte d’África y Toledo pa finar n’Uviéu ente’l 812 y el 842 pa la so proteición de la conquista musulmana del sur peninsular, onde se caltién na Cámara Santa. Testos del sieglu XIII falen del Arca Santa y d’esti actu –dalgún apunta a qu’El Cid acudió como testigu–, pero presenten duldes de la so autenticidá. D’esta época ye tamién el ‘Testamentu Ecclesie Sancti Salvatori’ con testu d’Alfonso II, el cartulariu más antiguu de la Península Ibérica, “aparentemente manipuláu”.

Pelayo, posiblemente del círculu d’Arias Cromaz, utilizó un complexu corpus testual conformáu pol ‘Liber Testamentorum Ecclesiae Ovetensis’ y el ‘Corpus Pelagianum’ nos que “recontestualiza elementos anteriores que garren significaos nuevos”. Asina, fala de ‘Lucus Asturum’, ciudá romana que cita Ptolomeo próxima a Llugo de Llanera, nel ‘Liber Testamentorum Ecclesiae Ovetensis’ basándose na Historia Wandelorum d’Isidoro de Sevilla. El testu sufre modificaciones, faciendo católicu a Guntamundu y nomándolu fundador de la ciudá episcopal cuya sede se treslladó depués a Uviéu. “¿Por qué? Pa da-y a Uviéu una antigüedá que nun-y correspuende realmente”, apunta la doctora en Xeografía y Historia. Otros testos d’esta época son les inscripciones fundacionales de San Salvador d’Uviéu o la reelaboración pelayana de la tresllación a la ciudá del Arca Santa, nel qu’equipara a esta reliquia cola Arca de l’Allianza.

Les cruces d’Uviéu

Los testos pelayanos tamién reconstrúin dos elementos memoriales qu’anguaño tienen un posu importante ente la población, como son les dos cruces d’Uviéu: la de los Ánxeles, donada por Alfonso II nel 808, y la de la Victoria –la que portó Pelayo–, por Alfonso III nel 908. Les dos son son cruces recubiertes por xoyes, siguiendo una tradición bastante estendida n’Europa na época basada na cruz del Gólgota, como pueden ser la de Brescia y la de Lotario.

Sobre la primera, símbolu d’Uviéu, Alonso Álvarez apuntó desconocer la función orixinal de la mesma, yá qu’estes cruces solíen tar suspendíes sobre l’altar. “Ésta carez d’enganche”, señala, polo que se supón que se custodiaría y que nel cultu sería enarboliarda pol celebrante. Sábese con certeza que nel sieglu XII sería la cruz del altar mayor de San Salvador d’Uviéu y que la so llenda nun apaez hasta esti tiempu. Nella, dícese que la cruz fixéronla dos ánxeles –los que se conserven xunto a ella na Cámara Santa nun son más antiguos del sieglu XIX–, convirtiendo asina la cruz en reliquia y pasando ésta al Tesoru –el nome de Cámara Santa nun s’utiliza hasta más alantre– nun altar mayor nel sieglu XIII.

No que respeuta a la Cruz de la Victoria, con pieces d’oru sobre alma de madera, foi posiblemente una cruz procesional nos sos anicios. La llenda sobre la so presencia nes manes de Pelayo na batalla de Cuadonga nun apaez hasta’l sieglu XVI refiriéndose a un inventariu del sieglu XIV nel que yá se noma esta historia, anque nel ‘Corpus Pelagianum’ yá apaez una imaxe de Pelayo sosteniéndola.

Los testos del obispu Pelayo tamién sitúen los destinos d’enterramientos de tolos reis asturianos hasta’l Alfonso II, monarca que fixó la so corte n’Uviéu, y afita’l papel protector d’Asturies de reliquies frente a los ataques esternos. Poro’l relixosu ye protagonista d’un sieglu XII nel que “hebo una sofisticadísima reconstrucción memorial de los símbolos d’Asturies” qu’anguaño se caltienen, como ye la Cruz de la Victoria na bandera del país.

Na semeya, Alonso Álvarez y Amadéu Benavente, d'Ástura.

Contador Estadistiques