Sarkozy y Cameron, primeros llíderes occidentales en visitar Libia

Nicolas Sarkozy, presidente del Estáu francés, y David Cameron, primer ministru británicu, convirtiéronse nos primeros llíderes occidentales en visitar Libia. Dambos comprometiéronse n'ayudar al CNT a dar caza a Gadafi.
 
“El pueblu libiu ha saber qu’a los que cometieron los crimes van persiguilos”, aseveró Sarkozy, qu’aseguró que “Muamar Gadafi tien qu'acabar deteníu”. El mandatoriu francés pidió al Conseyu Nacional de Transición (CNT) qu'evite “cualquier forma de venganza” y aseguró que la OTAN va siguir cola so misión en Libia mientres siga siendo necesaria.
 
Pela so parte, Cameron aseguró que ta “arguyosu del papel xugáu por Reinu Xuníu na lliberación del pueblu libiu”, pero alvirtió que foron los libios los que la consiguieron. “Ésta ye la vuesa revolución, nun ye la nuesa revolución”, declaró. El primer ministru británicu prometió que'l so Gobiernu va ayudar a estabilizar Libia y a capturar a Gadafi, porque “esto nun acabó”, y aseguró que Londres va entregar ayuda médica y va collaborar nos llabores de desmináu y de reconstrucción del país.
 
Mentes, na mesma rueda prensa celebrada en Trípoli, el presidente del CNT, Mustafá Abdel Jalil, valoró l'apoyu de Sarkozy y Cameron. “Los nuesos héroes revolucionarios nun pudieren avanzar ensin el so apoyu”, aseveró. Coles mesmes, el primer ministru, Mahmud Jibril, destacó que nel alcuentru que caltuvieron dambos esti xueves colos llíderes francés y británicu, éstos “aceptaron desconxelar activos libios”.

Comparte...                                    

Enllaz permanente