San Matéu va de nueche folk

Esta selmana yá dimos anuncia d'una nueche de rock con dellos grupos asturianos, esta vegada toca-y al folk que tamién tien una nueche nes fiestes de la capital del Principáu.

El miércoles día 17 va haber una nueche folk dientro del programa de conciertos de les fiestes uvieines, esta nueche folk nun ye la primer vegada que tien un espaciu nestes fiestes. Ye d'agradecer que nel programa de conciertos onde rescamplen nomes como Sergio Dalma, Rumbo a la Fama o Mikel Erentxun, haya un requexu pa los grupos asturianos.

Los grupos asturianos que van actuar son "Gatos del Fornu", grupu d'Uviéu que sacó esti añu a la cai'l so primer discu en solitario. De xuro que pa esti grupu Uvieín onde los haya va ser una actuación perespecial. Dempués los incombustibles "Nuberu" colos sos cantares de siempre, anque hai que comentar que nestos momentos el so cantante Chus Pedro ta preparando un discu en solitariu con nuevos cantares. Pa que nun baxe l'ambiente de la nueche pal final tan reservaes dos bandes con un folk conocío y reconocío. Los Llunáticos "Tejedor" y "Llan de Cubel" piesllen la nueche folk d'Uviéu que va ser na Plaza la Catedral y que va entamar a les 21:30 hores.

Tamién hai que facer mención de l'actuación d'un artista asturianu de lo más célebre. Jerónimo Granda va actuar tamién na Plaza la Catedral el martes día 16, la hora d'empiezu tamién ye les 21:30 hores y va actuar xunto a Victor Luque.