Samuel Sánchez convirtióse en Luz-Ardiden nel quintu asturianu en llograr una etapa nel Tour de Francia

El campeón olímpicu de ciclismu en ruta, Samuel Sánchez, quitóse una espina al vencer el xueves una etapa del Tour tres años raspiando'l trunfu. Cola victoria en Luz-Ardiden, conviértese nel quintu asturianu en ganar na ronda gala.
 
Samuel Sánchez (Euskaltel-Euskadi) superó nos metros últimos del altu míticu de los Pirineos al belga Jelle Vanendert (Omega Pharma-Lotto) tres una etapa dura nel que los ciclistes tamién xubieron La Hourquette d'Ancizan y el Tourmalet. Foi na baxada d’esti puertu que tien un sitiu acutáu na historia del ciclismu onde atacó l’uviedín pa llegar a la falda de Luz-Ardiden nun grupu d’ocho corredores cerca de la cabeza de carrera, Geraint Thomas (Sky Procycling) y Roy (FDJ). Sánchez punxo un ritmu perfuerte tola xubida que namái Vanendert pudo aguantar, pero’l belga llegó desfondáu al quilómetru últimu y, pese a atacar, l’uviedín sacó-y siete segundos na llinia de meta, algamando asina un trunfu d’etapa asturianu nel Tour 24 años depués.
 
Naquella ocasión, nel añu 1987, foi Manuel Jorge Domínguez el ganador, anque tuvo qu’esperar cinco díes pa cellebrar el trunfu. El llavianés llegara segundu nel esprín a la meta de Troyes tres l’italinu Guido Bontempi, que daría positivu nel control antidoping. Yera la victoria última del palmarés asturianu nel Tour qu’abrió, nel 1971, El Tarangu. José Manuel Fuente facía historia al ganar dos etapes consecutives na ronda gala, una etapa en llinia –d’alta montaña– y una cronoescalada. Sicasí, Vicente López Carril superaría la cifra d’El Tarangu años depués al sumar tres trunfos d’etapa: en 1973, 1974 y 1975. Completa esta llista de privilexaos José Ángel Sarrapio, vencedor nel 1986 en Poitiers, etapa que tuvo’l so final nun Futuroscope a punto d’abrir les puertes.
 
Na semeya, Benjamín Noval y Samuel Sánchez sofitando la oficialidá de la llingua asturiana.

Comparte...                                    

Enllaz permanente