Samartín del Rei Aurelio celebra la Selmana de les Lletres

La Selmana de les Lletres desarróllase dende'l pasáu vienres 28 nel conceyu de Samartín del Rei Aurelio, qu'amás va espurrila con una riestra d'actos programaos d'equí al día 9 de mayu, dellos en collaboración cola Conseyería de Cultura y otros a iniciativa propia al traviés del so Serviciu de Normalización Llingüística.

Dempués de la representación el pasáu vienres 28 en Teatru Municipal de Samartín del Rei Aurelio de L'Entregu de la obra Les cartes, de Pilar Murillo Bravo, pola Compañía de Teatru "La Diosa del Sarcasmo", el próximu día 5, en Centru Social de Blimea los escolinos del IES Juan José Calvo Miguel van facer una llectura de testos n'asturianu acompañada d'una representación teatral a cargu del Grupu de Teatru "El Refaxu" de Blimea. Pal domingu 7 en de L'Entregu la Compañía de Teatru "Nun Tris" va poner n'escena la obra "El caballeru de la murnia figura" a les 22:00h mientres que'l martes 9 a les 12:30h nel IES "Virgen de Covadonga" de L'Entregu va facese la Celebración de la Selmana de les Lletres Asturianes cola llectura dramatizada por parte de los escolinos d'una comedia de guirrios y la visita de los autores de teatru, Roberto Corte, Chechu García y Pablo Rodríguez Medina. Esi mesmu día, pero a les 17:30 h na Casa de Cultura de L'Entregu va facese una mesa redonda abierta al públicu colos autores del nuevu teatru asturianu y col títulu "Otru nuevu teatru en llingua asturiana, ¿ye posible?" un debate al que van asistir ente otros Nel Amaro, Xurde Álvarez, Ramón Lluis Bande, Xabiero Cayarga, Roberto Corte, Dolfo Camilo Díaz, Chechu García, Pablo Rodríguez Medina y Jorge Fernández García. L'actu va zarrase cola actuación del artista y escritor Nel Amaro, que tamién tien na Casa de la Xuventú de Sotrondio los díes del 2 al 15 de mayu una esposición de poemes visuales y acciones baxo'l títulu "asturiana.es".