Salvador Allende, pioneru de la internet

Cuando se cumplen los 30 años del guelpe d'estáu qu'acabó col gobiernu de Salvador Allende en Chile, la reclamación de xusticia de les más de 300.000 persones víctimes de la tortura militar baxo la dictadura de Pinochet entovía ye una cuestión pendiente. Amnistía Internacional denunció que los crímenes de la dictadura siguen ensin castigu, y esta y otres organizaciones denunciaron que la propuesta del Gobiernu de Chile sobre Derechos Humanos nun val en cuantes que nun retira la Llei d'amnistía a los militares que punxere Pinochet.

Xunta la reclamación de xusticia pa les víctimes, esti 30 aniversariu dedicose, pol aquello de los númberos redondos, a asoleyar documentación nuevo sobre la figura de Salvador Allende. El presidente que quixo más morrer defendiendo'l gobiernu qu'entregase a los mlitares y que se despidió del país con un épicu discursu ye ensin dulda un personaxe míticu pa la izquierda pol altor moral que representa y por ser un adelantáu que foi a axuntar les voluntaes de delles opciones polítiques nuna candidatura común que tenía por pegoyos programáticos la reforma agraria, la nacionalización de los mayores recursos del país. La Fundación Salvador Allende presenta bien de documentación sobre'l presidente, lo mesmo que delles webs en que puen descargase discursos y documentos de la época

Pero el casu ye qu'Allende, al paecer, tamién foi un adelantáu de les nueves tecnoloxíes. Según descubrió esti fin de selmana'l periódicu inglés The Guardian (l'artículu pue lleese en castellanu na web de Clarín) el gabinete Allende mandose d'una potente intranet informática mui adelantada pa primeros de los 70 y que valió pa coordinar esfuerzos na llucha contra les fuelgues patronales qu'intentaron baltiar al gobiernu nos primeros meses del 73. El proyectu Cybersyn, nome de la criatura, tamién valió pa meyorar la xestión de los negocios acabantes d'estatalizar, pero la xunta militar que garró'l poder nun-y vio provechu al inventu y dexolu morrer.