Rubiera quedó ensín maillot Oru

Xixón foi l'escenariu pal entamu de la Vuelta Ciclista a España del 2003 con una contrarreló por equipos de 28 km. pela rodiada de la ciudá. El mayor aliciente pa esta etapa yera ver si l'equipu del ciclista de Baldornón Chechu Rubiera, l'US Postal, yera'l vencedor y asina'l ciclista xixones saldría mañana col maillot Oru. El másimu rival pal equipu americanu yera la ONCE-Eroski, que recordemos que na edición del añu pasáu ganó al equipu americanu. El guión taba escritu pa una fiesta col públicu volcáu con Chechu, arropáu pola presencia de la peña que tien en Llanera.

El primer equipu en salir, l'Ibanesto, marco'l meyor tiempu hasta la salida de la ONCE. L'equipu de Manolo Saiz ye un especialista d'esti tipu de cronos y demostrólo dende'l primer kilómetru, finando la etapa con 24 segundos de ventaxa sobre Ibanesto, y marcando siempre'l meyor tiempu en tolos pasos intermedios. El siguiente equipu n'entrar yera'l de Chechu pero les coses nun se-yos poníen mui bien a los d'azul, que yá nel kilómetru 3,6 perdíen 16 segundos respectu a la ONCE. La mala salida o quicias el miéu a les cuestes de La Providencia ficieron-yos perder esos segundos que nun foron a recuperar dafechu a lo llargo de la preba. El restu de la etapa, el US Postal fizo siempres meyores parciales que la ONCE, pero los de Saíz supieron alministrar perbien la so renta, finando la etapa nun tiempu de 32 minutos y 1 segundu, 10 menos quel'US Postal, qu'entró a meta con Chechu encabezando la escuadra. Terceru foi l'Ibanesto a 24 segundos y con un meritoriu cuartu, el KELME del inéditu Óscar Sevilla, que vien d'un añu en blanco.


El líder de la ONCE, Igor Gonzalez de Galdeano, vistióse d'oru y nagua por entrar en Madrid con esi color. Pela so parte Rubiera declaró qu'a pesar de nun cumplir l'oxetivu que tenía pa güei ta mui motiváu pa facer una bona Vuelta.

El restu de ciclistes asturianos participantes, Santiago Pérez y Benjamín Noval, tuvieron una actuación discreta, yá que los sos equipos nun contaben entre los favoritos pa esta etapa. El Phonak de Santiago Pérez acabó décimu a 1 minutu y 4 segundos, mientres que'l Relax-Fuenlabrada de Benjamín Noval, perxudicáu por una cayida nel trescursu de la etapa que dexó al líder del conxuntu, Santi Blanco con posible francedura de pómulu, foi penúltimu a 2 minutos y trenta segundos del vencedor.

La etapa de mañana, con 148 kmts de recorríu, sal de Xixón y llega a Cangues d'Onís pasando pel Altu del Fitu. Esti puertu de 1ª categoría, puestu a 18 kilómetros de la llegada puede romper el pelotón y faer que rescamplen les fuercies de más d'ún. Esperemos que los nuesos ciclistes faigan un bon papel.