Rubiera anuncia que L’Arribada va organizar una actividá de llingües minoritaries nel Festival Atlánticu

|

Esti llunes presentóse en Xixón la sesta edición de Vagamar, festival que va inaugurase’l vienres. Nel actu, el conceyal Carlos Rubiera anunció que L’Arribada va encargase d’organizar una actividá de llingües minoritaries nel Festival Atlánticu.
 
El conceyal d’Educación, Cultura, Mocedá y Festexos foi’l primeru en tomar la pallabra na presentación de Vagamar 2011, entamada pola Asociación Cultural L’Arribada, intervención na que destacó que’l presupuestu d’esti festival lliterariu que va inaugurase’l vienres de manera oficial –anque pa mañana yá tán programaes actividaes dientro de 'Rolda'– “nun pasa de los 12.000 euros”, lo que pa Rubiera ye “dalgo relevante pa que los ciudadanos tengan oportunidá de comparar lo que cuesten aquelles actividaes nes que s’implica’l texíu asociativu de los ciudadanos y nes que, polo tanto, hai muncho amor puesto y altruísmu, en rellación a otres actividaes que s’entamen a veces con un aparatu mediáticu grande y con un aparatu presupuestariu ampliu”. D’igual forma, reseñó que’l Conceyu de Xixón da una subvención a L’Arribada de 8.000 euros pa toles actidaes qu’organiza nel 2011, pa depués destacar la intención de la conceyalía qu’encabeza de mantener una collaboración permanente “coles entidaes ciudadanes que tán dispuestes siempre a collaborar de la meyor manera posible con iniciatives nes qu’hai muncho amor y muncho sacrificiu personal puestu”.
 
Nesti sen, Rubiera anunció la esistencia d’un prealcuerdu ente la Conceyalía d’Educación, Cultura, Mocedá y Festexos y L’Arribada pa qu’esta asociación cultural ponga en marcha “toles actividaes rellacionaes cola lliteratura nes llingües –la mayoría minoritaries– correspondientes a tolos países que participarán nel 2012 nel Festival Atlánticu de Xixón que yá tamos planificando nesti mesmu momentu”. Al respeuto, Rubiera recordó otra vuelta qu’esti Festival que va celebrase na segunda quincena de xunetu nun va tener la etiqueta ‘céltica’ o ‘celta’, “sinón que va ser un Festival Atlánticu cola intención d’integrar a “Portugal y al País Vascu”, xunto coles naciones celtes y otros territorios del Arcu Atlánticu, ente los que citó Iparralde y “posiblemente Normandía”.
 
Ensin sectarismos
 
Xosé Nel Riesgo, direutor nuevu de la Fundación Municipal de Cultura, Educación y Universidá Popular de Xixón, recordó la so vinculación con L’Arribada, “qu’entamó nel añu 2004 o 2005, cuando venía dende Avilés p’aconceyar con Humberto y con otros compañeros nel Dindurra”, momentu nel que “falamos de facer dalgo en Xixón, que siempre foi una ciudá abierta, que frañara dafechu col sectarismu o ‘capiellismu’ que llámabemos d’aquella, d’una bona parte de la lliteratura asturiana”. Asina, comentó, nació l’Asociación Cultural L’Arribada cola mar como elementu poéticu “que podría illustrar meyor el nuesu enfotu como espaciu abiertu al que nun se pue poner llendes. Y depués, de la cabeza d’Humberto, la Vagamar”.
 
D’igual forma, Riesgo aseguró que dende hai trés años nun tien vinculación dalguna con L’Arribada “nin a nivel organizativu nin asociativu por mor de responsabilidaes familiares”, lo que nun quitó que mantuviera contautu telefónicu colos miembros d’una asociación cultural “que consiguió que naide, en función de la so ideoloxía, de les sos idees, de la so manera de pensar, tuvieren nunca una puerta zarrada pa venir a esti eventu cultural a presentar un llibru, a dar una conferencia, una charra o lo que fuere. Y esi ye’l meyor exemplu de lo que ye ser antidogmáticos y de lluchar en contra del sectarismu y el maniqueísmu, que son grandes males de la humanidá”. Por último, destacó que l’encargu qu’anunció Rubiera sobre’l papel de L’Arribada nel Festival Atlánticu de Xixón “cumple dafechu colos fines fundacionales d’esta asociación”.
 
Pela so parte, Humberto Gonzali, coordinador de L’Arribada, tres dar les gracies a Rubiera y Riesgo pola so presencia, encargóse de comentar los detalles de la Vagamar d’esti añu. Asina, confirmó que, de momentu, les persones confirmaes que van participar nesta edición yá supera la centena, cola esperanza d’algamar la cifra de 140 nos díes próximos. “Vamos tener en total 29 presentaciones de llibros; trés esposiciones –en collaboración cola Fundación Vicente Ferrer, cola Oficina Municipal de la Llingua de Xixón y con Tierra Astur–; van proyeutase dos documentales y dos llargomatraxes doblaos al asturianu, ente los que destaca l’estrenu, el día 23, de la película de vaqueros ‘McLintock”; dos recitales poéticos; ochos meses de debates nes que se van repasar dellos aspectos del estáu, futuru posible y propuestes alredor de xéneros lliterarios y la llingua asturiana; cinco actuaciones musicales; un homenaxe sentíu a Eladio Sánchez y Pilar Ibaseta, figures básiques de la Compañía Asturiana de Comedies; la entrega de los dos premios Timón a Vicente García Oliva y a Méjica; dos conferencies; y dos comunicaciones”, rellató Gonzali.
 
“En definitiva, tenemos un programa estensu col que, a lo llargo de más de quinces díes, vamos a dar una ufiera amplia sobre lo que ye la lliteratura n’asturianu y en gallego-asturiano, con una parcela pequeña pa los escritores asturianos en castellanu. Tamién vamos tener unos invitaos del País Vascu que nos van ufrir el so trabayu como poetes y ‘rapsodes’”, continúo’l coordinador de L’Arribada, qu’invitó a tol mundu a participar nes actividaes programaes pa setiembres. Éstes van principiar mañana con un eventu incluyíu na seición ‘Rolda’: la inauguración d’una esposición nel Centru Municipal Integráu de L’Arena, en collaboración cola Fundación Vicente Ferrer, baxo’l nome de ‘Comprometidos con Anantapur’, que va tar abierta al públicu hasta’l día 26. L’actu va principiar a les 19.30 hores y va consistir na proyeición d’un documental que lleva’l nome de la muesta; una conferencia a cargu de Lancy Dodem, voceru de la Fundación Vicente Ferrer, sobre ‘La india rural y el proyecto de la Fundación Vicente Ferrer’; y una esbilla lliteraria cola llectura de poemes d’escritores indios tornaos al asturianu.

Contador Estadistiques