Rocea col campu de golf en Vidíu

El proyectu de la empresa Landmark pa poner un campu de golf nel espaciu protexíu del cabu Vidíu (Cuideiru) xenera la rocea de tol movimientu ecoloxista. Landmark, la empresa americana que ta tres del proyectu, ta nel puntu de mira de los conservacionistes asturianos, que tan analizando les actuaciones de la multinacional americana n'otros llugares

Ello ye que la Sierra Norte de Madrid tien otru proyectu pendiente asemeyáu al de Cabu Vidíu. Landmark ta ellí faciendo una etapa "de sondeos" sobre l'interés de vecinos y conceyos de la zona. El proyectu a desarrollar ye asemeyáu al d'Asturies, siguiendo la plantiya qu'aveza a gastar Landmark nes sos actuaciones, con urbanizaciones y instalaciones hosteleres de toa triba arrodiando a un campu de golf que namás ye una parte del proyectu global, y non necesariamente la parte que da más beneficiu económicu

La Coordinadora Ecoloxista d'Asturies destaca que, dempués d'analizar proyectos gobernaos por Landmark en tol mundu, esisten dellos "denominadores comunes" ente toos ellos. En primer llugar, toos s'asitien en comunidaes en crisis o situación económica de desventaya, y, en segundu llugar, toos escueyen llugares de gran atractivu natural, son los casos de Puerto Escondido-Loreto, na Baxa California (México), nel Parque Nacional de Doonbeg (Irlanda) o na Sierra Madrileña.

La refuga de los ecoloxistes asturianos al proyectu de Landmark tamién concueya cola de Karin Dubsky , coordinadora de la campaña Coastwatch (proyectu continental financiáu pola Unión Europea) y profesora del Trinity College de Dublín. La irlandesa ta esmolecida concretamente pol proyectu de Doonbeg, na costa del condáu de Wexford, onde'l campu de golf s'asitió nun sistema de dunes de sable declaráu como espaciu protexíu. Amás de l'alteración nel sistema dunar, l'informe de Dubsky sobre'l campu de golf n'Irlanda fala d'un "cambéu nel carácter de la zona" onde "los visitantes nun s'integren cola comunidá local porque nun salen del complexu recreativu". La Coordinadora Ecoloxista declara que la doctora irlandesa mostróse esmolecida poles posibles consecuencies del proyectu de Vidíu y ofrecióse pa cualquier accción sobre'l tema.

El grupu ecoloxista diz que l'interés de Landmark en Vidíu ye especulativu dafechu, y sorraya esta afirmación con un xiru irónicu recoyendo unes declaraciones del xerente de Landmark, Gerald G. Barton a "The New York Times" nes que fala sobre'l proyectu a executar en en Loreto (México) y nes que presume de nun tener garráu un palu de golf en tola so vida .