Robert de Niro ponse tres de les cámares na estrena de la selmana

La historia de como entamó la CIA contada tres la cámara por
Robert de Niro y la tématica cristiana, inevitable por estes feches,
protagonicen les estrenes d'esta selmana nes carteleres del nuesu país.
Col títulu de "El
buen pastor", Robert de Niro dirixe actores perconocíos como
Matt Damon, Angelina Jolie, Alec Baldwin,Tammy Blanchard, Billy Crudup, John
Turturro y William Hurt nuna historia que quier contanos como
emprincipió l'axencia estatal d'espionaxe mas famosa y poderosa del
sieglu XX, la norteamericana CIA.

Y como yá ye clásico en Selmana Santa, la temática
relixosa apaez nes estrenes de la cartelera. D'esti mou, dende los EE.UU
lléganos "La cosecha",
que cuenta como nun pueblu pequeñu de Louisiana sofre les diez plagues
descrites pola Biblia. L'actriz Hilary Swank- protagonista de la oscarizada
"Million dollar baby"- interpreta a una ex-misionera que
tendrá que resolver el misteriu qu'encierren esos fenomenos
estraños. Una coproducción italoespañola trata
tamién la relixón, nesti casu col títulu de "En busca
de la tumba de Cristo". Nella nárrase como les autoridaes romanes
de Xudea encarguen a un oficial imperial interpretáu por Daniele Liotti
investigar si realmente Xesucristo ta enterráu o si resucitó,
cola sida de finar los rumores que sobre la so resurreción cuerren
pente'l pueblu xudíu. Mas estrenes de la selmana na nuesa
cartelera.