Riopedre y Ana Cano inauguren los XXII Cursos de l'Alla

El conseyeru d'Educación y Ciencia, José Luis Iglesias Riopedre participa esta mañana n'Ibias na inauguración oficial los 22 cursos de branu de l'Academia de la llingua Asturiana, actu que va presidir a la 1 de la tarde la presidenta de l'Academia de la Llingua, Ana Cano y nel que tamién va participar la vicerrectora d'Estensión Universitaria, Paz Andrés Sáenz de Santamaría.

Los cursos, que desarrollen en Santantolín d'Ibias, aconceyen a 150 alumnos que van participar d'una amplia y interesante ufierta formativa, según señaló'l director de los cursos, Xosé Antón González Riaño, quien esplicó que s'escosó la matrícula en toles especialidaes que s'ufierten. Asina, en primer llugar alcontramos la convocatoria de tolos años en collaboración cola Universidá d'Uviéu, na que s'enxerten los cursos elemental y avanzáu de llingua asturiana y el de capacitación pa la traducción al asturianu. Estos trés cursos vencéyense al programa de cursos de branu del Vicerrectoráu d'Estensión Universitaria de la Universidá y, polo tanto, aporten créditos de llibre configuración.

En segundu llugar, la ufierta dientro de los "Cursos d'afondamientu cultural y llingüísticu" incluye esti añu cuatro cursos distintos, entamando pel de capacitación pa la traducción al asturianu dirixíu por Xosé Lluis García Arias.

La ufierta sigue col de Patrimoniu Históricu, artísticu y cultural, que va dirixir Margarita Fernández Mier. La vieya y la nueva música folk n'Asturies son oxetu d'otru d'estos cursos, dirixíu por Nacho Fonseca, mientres que'l biólogu Carlos Lastra va llevar la dirección del cursu "ecoloxía y mediuambiente n'Asturies". D'otra manera, los alumnos que l'añu pasáu participaron nel primer cursu de capacitación en gallego-asturianu rematen anguaño la enseñanza nesta especialidá cola celebración de la segunda fase d'esti plan formativu