Rio Narcea dobló la producción

La multinacional minera Rio Narcea Gold Mines ta acabante d'espublizar los resultaos correspondientes al primer trimestre del exerciciu 2.003. El balance de la empresa qu'esplota les mines d'oru del occidente astur presenta númberos positivos, con un beneficiu de 1 millón de dólares que rescampla más cuando se pon en comparanza colos datos de va un añu, cuando Rio Narcea entregó númberos encarnaos per importe de 1.8 millones de dólares.

Contra les 25,117 onces que se produxeron nes mines de Carllés y Boinás nel primer trimestre del 2.002, estos tres primeros meses d'esplotación del 2.003 presenten una producción de 49,065 onces, cerca del doble, y ello con un coste por onza de 120 dólares contra los 194 que costaba sacar una onza va un añu. Aparte d'esto, la xuba del preciu del productu en mercáu, que pasó nesti tiempu de 263 dólares la onza a 339, tien tamién muncho que dicir nos bonos resultaos de la compañía, anque Río Narcea apunta tamién se beneficiaron de los meyores sistemes d'aprovechamientu, obteniendo agora más oru, más puro y con menos índiz d'arsénicu y bismutu. Otramiente, la multinacional canadiense tamién pon fecha pa qu'eche a andar la mina baxo tierra complementaria a la esplotación n'abertal, que va ser nel mes de xunu