Rescaten una utre en Pena Sobia

Si la otra selmana los guardes de Mediu Rural recuperaben una cría de zapiquera na redolada del Parque de Redes, otru páxaru d'una especie minoritaria rescatáu ye noticia esta selmana.

Una comunicación col serviciu 112 d'emerxencies punxo a la guardería rural en conocimientu de la esistencia d'un exemplar d'utre que taba dientro d'un bebederu pa les vaques en Pena Sobia, en conceyu de Teberga. L'ave presentaba un mal estáu de salú qu'encamentó a llevalu a la Casa del Osu de Proaza, onde trató al animal personal especializáu que tuvo que recuperalu de los s´ntomes d'hipotermia que presentaba dempués d'un tiempu indefiníu nel agua del bebederu. Darréu llevóse a la utre a una clínica veterinaria énte la posibilidá de que pudiere comer daqué envelenao, pero afortunadamente, tres de 24 hores n'observación viose que'l páxaru nun presentaba más síntomes de mal nengún, colo que se procedió a tomá-y tolos datos biométricos precisos y, finalmente, facer la suelta na Collada d'Aciera, en Proaza, llevantando'l vuelu la utre con normalidá y axúntándose con otros páxaros de la mesma especie que volaben pel llugar

La utre ye un páxaru carroñeru de gran tamañu -hasta 3 metros ente les puntes de les ales- que n'Asturies va venceyáu en munchos casos cola presencia de ganáu, faciendo grandes desplazamientos pa dar col alimentu y viviendo en colonies de dellos páxaros de la mesma especie.

Dende la Conseyería de Mediu Rural señalen que, acordies cola so rellación col ganáu, la utre tien abonda presencia pa la parte del oriente d'Asturies, espardiéndose de va unos años p'acá pa contra los montes del centru del país, como ye'l casu del exemplar recuperáu