Renfe viende 7.000 billetes en 90 minutos del tren de velocidá alta pela variante de Payares

Asturies va destinar un millón d'euros pa promocionase en Madrid, Valladolid y Lleón.

La campaña de Renfe de 25.000 asientos a partir de 18 euros a la venta per 10 díes pa promocionar la llegada de la velocidá alta a Asturies cola apertura de la variante de Payares ye un ésitu y yá queden mui pocos billetes del preciu más económicu nos díes con más demanda. Pa la primer fin de selmana, la del 1 al 3 d'avientu, a primer hora de la tarde quedaben de 33,85 a 60,95 euros si buscamos nel trayeutu Xixón-Madrid ida y vuelta, y a 40,60 el primeru que'l xueves 30 d'esti mes va pasar el túnel de la variante de Payares de Campumanes a Lleón.

A les 9 en puntu había una filera virtual de más de 200 persones y minutos depués había hasta 10.000 persones n'espera. Dende la compañía confirmóse que n'hora y media yá vendiera 7.000 asientos, y nel momentu de redautar esta noticia la cifra yá superaba los 12.000.

Otra manera, la compañía ta emplegando l'asturianu parcialmente en redes sociales pa presentar la so ufierta, como se pue ver na imaxe qu'acompaña esta información.

Campaña 'Asturias, más cerca que nunca'

Mentes llega esa esperada fecha, el Gobiernu presentó esta mañana na Mesa de Coordinación pa la Llegada de la Velocidá Ferroviaria Alta a Asturies la campaña de promoción que va poner en marcha en Madrid, Valladolid y Lleón, baxo'l lema 'Asturias, más cerca que nunca', na que va invertir dende'l llunes un millón d'euros. Ésta va desendolcase nes estaciones d'AVE de les trés ciudades y, a partir del día 20, en pantalles dixitales y nos autobuses municipales madrilanos.

La promoción inclúi publicidá n'otros soportes: Internet y medios especializaos en turismu de congresos y axuntamientos, asina como la presentación d'Asturies como destín AVE dirixida al sector profesional nestes ciudaes, na Feria IBTM de Barcelona y en viaxes de familiarización con operadores y axencies de viaxes. Na segunda etapa, tamién va llevase a FITUR.