Renfe va cambiar el modelu de tren de la llinia Asturies-Madrid tres el branu

La llinia de ferrocarril Asturies-Madrid va contar con un modelu de tren de capacidá menor que l’actual depués del branu. Representantes de Renfe defendieron n’Uviéu esta decisión mui criticada polos usuarios, sindicatos y partíos políticos asturianos.
 
L’Alvia S-120.050 ye’l tren escoyíu por Renfe pa sustituir al Alvia S-130 que n’actualidá fai’l serviciu ente Asturies y Madrid, y que van pasar a percorrer otres llinees de la rede estatal. El modelu que va aportar a les estaciones asturianes cuenta cola mesma velocidá que l’anterior, pero ye más pequeñu, nun dispón de cafetería y tiene una capacidá menor. Asina, de les 299 places del S-130, va pasase a les 223 del S-120.050, lo que supón 73 pasaxeros menos por viaxe.
 
La polémica que ta llevantando esta modificación llevó güei a la empresa ferroviaria a convocar una rueda de prensa n’Uviéu, onde esplicaron les razones del cambiu de modelu de tren. “Con esta decisión, Renfe trata d’estender la velocidá alta y les prestaciones del Alvia al mayor númberu de viaxeros posibles, nesti casu a Murcia y Galicia, ensin perxudicar a los asturianos”, defendió Urquijo, direutor xeneral de Viaxeros de Renfe, que tuvo acompañáu pol direutor de comunicación de la compañía, Jesús Parralejo. Los representantes de Renfe aseguraron que-yos "da la risa cuando se diz que con esti cambiu trátase a los asturianos como ciudadanos de segunda" y defendieron que nun hai casi diferencies ente los dos modelos.