Renfe entama a facer serviciu con trenes de velocidá alta

Renfe va poner en serviciu dende esti martes 6 de payares, los nuevos trenes de la serie de 130 fabricaos pol consorciu Talgo-Bombardier, conocíos como los nuevos 'Alvia', que van cubrir los trayectos ente Madrid, Xixón y Alicante.

Estos trenes "autopropulsaos", que van sustituyir a los tradicionales Talgo que realicen esti serviciu nesti momentu, caracterícense por ser vehículos de velocidá alta ya que van poner algamar los 250 kilómetros/hora nes víes d'anchu UIC o internacional y los 220 kilómetros/hora nes víes d'anchu ibéricu o convencional.

Amás, los nuevos vehículos cuenten con equipos eléctricos de potencia d'última xeneración basaos en microprocesadores de tecnoloxía avanzada "bitensión" de Bombardier MITRAC pa 3 kv de corriente continua (pa les víes d'anchu ibéricu).

Otra de les particularidaes de los nuevos 'Alvia' ye que se trata de trenes de "rodadura móvil", lo que-yos va permitir realizar el cambiu d'anchu de vía automáticamente, ensin tener que camudar de llocomotora al traviés de les llinies d'anchu internacional y les d'anchu ibéricu, como'l construyíu ya na población vallisoletana de Valdesillas, pa la futura llinia d'alta velocidá Madrid-Valladolid, que va inaugurase'l próximu 22 d'avientu.