Reino Xuníu decide quedar fuera del alcuerdu sobre los trataos nuevos de la Xunión Europea

Ventiseis de los ventisiete miembros de la Xunión Europea (XE) alcordaron sacar alantre los trataos nuevos qu’endurecerán la disciplina fiscal na eurozona. El Reinu Xuníu ye l’únicu estáu que queda fuera de la reforma.
 
"Los xefes d'Estáu o de Gobiernu de Bulgaria, República Checa, Dinamarca, Hungría, Letonia, Lituania, Polonia, Rumanía y Suecia indicaron la posibilidá de formar parte d'esti procesu tres consultalo colos sos parllamentos cuando sía apropiao", asegura la declaración final adoptada al términu del Conseyu Européu. El primer ministru británicu, David Cameron vetó una reforma de los trataos a ventisiete tres la negativa del restu de llíderes europeos a otorga-y les garantíes que reclamaba pa desabrir a la City de Londres de la regulación financiera de la XE.
 
Pela so parte, el viceprimer ministru británicu, Nick Clegg, consideró que les esixencies plantegaes por Reinu Xuníu pa participar na xunión fiscal que defenden Francia y Alemaña son "modestes y razonables", y aseguró qu'esiste unidá na coalición gubernamental nesta cuestión. “Trátase de salvaguardes pal mercáu únicu, non pa Reinu Xuníu", sorrayó'l líder del Partíu Lliberaldemócrata, muncho más pro européu que'l so sociu de coalición, del Partíu Conservador. "Nun hubo nengún pidimientu de devolución de poderes de la XE a Reinu Xuníu y nenguna demanda d'una separación unillateral de los servicios financieros de Reinu Xuníu", añadió depués de que Londres decidiera nun apoyar la propuesta de reformar los trataos.
 
Pela so parte, l'ex ministru d'Esteriores llaborista David Miliband consideró que l'actuación del primer ministru británicu, David Cameron, en Bruxeles demostró "debilidá, non fuerza". Na so cuenta en Twitter, enantes de qu’Hungría camudara de parecer, opinó que "Reinu Xuníu saltó a un barcu de remos con Hungría frente a un 'supertanqueru' de 25 países. Eso ye debilidá, non fuerza".

Comparte...                                    

Enllaz permanente