Recrea entama’l Club Cultura Principáu d’Asturies, con descuentos pa la Llaboral y el CCI Avilés

La sociedá pública Recrea, encargada de la xestión de dellos equipamientos culturales del país, pon en marcha’l Club Cultura Principáu d’Asturies. La tarxeta ye de baldre y ufre descuentos pa les actividaes de la Llaboral y el CCI Avilés.
 
Al traviés d'un comunicáu, Recrea esplicó que la iniciativa surdió dada la participación nel Club Llaboral Ciudá de la Cultura, xestionáu pola mesma empresa. Asina, los sos casi 5.400 socios van incorporase agora de forma automática a esti nuevu programa de fidelización. Ente les ventayes del Club, la sociedá destacó que tolos socios van llograr descuentos ente'l 25 y el 40 por cientu na entrada a dellos museos y equipamientos culturales asturianos, como'l Muséu del Xurásicu, el Parque de la Prehistoria de Teberga o Llaboral Ciudá de la Cultura.
 
Tamién podrán beneficiase de descuentos d'ente'l 10 y el 20 por cientu n'espectáculos de la programación artística del Teatru de la Llaboral y del Centru Cultural Internacional Avilés, o esfrutar de tarifes reducíes en dellos servicios de la Estación Ivernal Fontes d'Iviernu. Coles mesmes, van disponer d'ufiertes d'últimu minutu o sorteos d'invitaciones pa determinaos espectáculos o eventos. Amás, van poder beneficiase d'una rede d'establecimientos vinculaos, a los que van siguir incorporándose nuevos collaboradores, nos que los socios van llograr ventayes especiales. La tarxeta ye gratuita y pue solicitase na web del Club Cultura Principáu d’Asturies o na recepción de Llaboral Ciudá de la Cultura.