Rato quier da-y derechos a EDP n'Hidroeléctrica

El mes pasáu, Joao Talone, executivu de la portuguesa EDP, entraba nel conseyu d'alministración d'Hidrocantábrico y declaraba a tolos medios de comunicación que la eléctrica lusa, qu'anguaño tien el 40% de les acciones de l'asturiana, contaba con acabar controlando dafechu HC pa facer con ella'l segundu grupu eléctricu de la península. De mano la intención de los portugueses pasaba per esperar hasta l'añu 2.005, añu en que vencía l'actual pactu d'estabilidá ente los tres accionistes mayoritarios (la mesma EDP, Caxastur y la alemana EnBW, filial de la empresa estatal gala EDF.

Ello yera que, anque EDP y EnBW teníen tantos por cientu mui altos del capital de la empresa (35% caún) les lleis españoles llendaben al 3% la representacion nel conseyu d'alministración de les empreses españoles a les empreses estatalizaes d'otros países, casu d'EDP y tamién indirectamente de EnBW, propiedá de la estatal francesa EDF. Esta norma ta agora pa desapaecer pola voluntá del Gobiernu español y, más esactamente, pola voluntá del Ministru d'Economía, Rodrigo Rato, quien ta preparando una retirada de la llexislación que llenda los derechos políticos d'estes empreses n'HC.

Con too y con ello, la retirada de les torgues llegales nun va ser equitativa, y namás va beneficiar al sociu portugués, ello d'alcuerdu a articular el mercáu ibéricu de la electricidá, mientres que'l sociu xermano-francés va quedar como taba. El Confidencial d'internet, ún de los medios más prestixosos que lleven na rede periodistes independientes, esplica los pormenores del entendimientu que tienen de va poco p'acá les autoridaes portugueses col ministru d'economía español.