Ramón Lluis Bande nun quier dir pela autopista

L'escritor y periodista Ramón Lluis Bande presenta a les 8 d'esta tarde na FNAC de Siero'l so primer rellatu pa neños "Un viaxe distintu" que cuenta coles ilustraciones de Mik Baró y nel que l'autor declara que quier fuxir de los "caminos trillaos" del xéneru, ufiertando una historia que convida a escoyer por ún mesmu'l camín a andar

El testu de presentación del llibru apunta delles claves del mensaxe que guarda'l llibru cuando declara que "Hai dos maneres de viaxar en coche: peles autopistes o pela carretera. Los que tienen priesa por llegar fain lo primero. Pero mio pa diz que lo más sensato y lo más prestoso ye lo segundo. Los que van pela autopista nun ven res, lleguen enantes que naide pero nun viaxen: namás se desplacen. En cambiu, los que van pela carretera, como mio pa y yo, convertimos cada viaxe nuna esperiencia distinta, nun descubrimientu y un placer".